上禮拜五花旗股市繼續喺高位反覆，技術走勢仲幾好，今晚個市可以睇好啲。
期油衝上59美元，但金價就大幅調整，梗係借美元反彈獲利回吐，睇油價、金價同美元嘅變化，好似有矛盾，但係如果大家睇遠啲而唔係睇短線，可能會發覺呢啲短線嘅矛盾係好正常，冇影響個大勢。
睇圖表，早幾日油價已經有反彈迹象，當時俊樺推介過中石油（857）嘅C輪，講過油價阻力位59美元，唔易破，𠵱家睇個圖，59美元仍然係好大阻力，就算再上，60、62同64美元都係阻力位，油價隨時掉頭回落，一啲都唔出奇，因為油價嘅大跌浪仲未有迹象完成。
金價又點？受制日線圖阻力位回落，但周線圖就靚咗好多，除非美元持續上升，如果唔係，金價整固一輪，有機會上破660美元推向680美元。
港股呢個禮拜嚟到關鍵時刻，破關炒上，升勢將會好凌厲，隨時破埋21000關先至過年，如果掉頭破位，個樣就唔同晒，過年前可能要試吓條50日線，都係嗰句，做好兩手準備。
中煤C輪9090：中煤（1898）上禮拜五報收6.15元，早前逼近7元關後隨國內股市回落，跌到20日線企穩，波幅收窄同成交縮減顯露調整完結嘅契機，上日裂口破阻力軌炒上，成交大幅增加，升破6.25元之後，可以再推向7元。中煤C輪9090報收1.10元，大成交雙底回升，槓桿率5.6倍（有效4倍），對沖值0.72，正股升上7元，9090會喺1.75元樓上，破位見7.50元，隻輪應該唔會低過2.15元，呢個價買，正股跌穿5.85元止蝕。
俊 樺