都話豬年旺丁㗎啦，敏妮公司除咗有兩個準媽咪，仲有一個準老竇肥仔Dick，佢太太都有咗5個月身孕。以前肥仔Dick最鍾意同四眼仔K傾飛機模型，家陣做咗準老竇，就成日搵開心媽咪Danise傾湊仔經，噚日馬王「精英大師」榮休，見到肥仔Dick就令我諗起另一隻馬──緊張大師。
「放鬆啲啦準老竇，你咁會畀好大壓力你太太㗎！」
齌醫療壽險平好多
Danise：「我都係咁話。呀，你上次咪問我關於教育基金嘅問題，我幫你搵咗啲剪報，不過有個理財專家喺度，你問佢咪仲好！」
Dick：「係噃，敏妮，我想同BB整番個教育基金，有乜好介紹？我個保險經紀知我老婆有咗，已經成日打電話嚟sell我。」
「DIY啦。我哋先拆解吓兒童教育基金，要有啲乜嘢元素先。Touchwood講句，如果爸爸媽媽有乜意外，BB需要有個保障，所以你哋要有一份人壽同醫療保險，但唔需要有投資成份，咁價錢會平好多。」
Dick：「通常保險經紀都會話，淨保險，供滿冇得攞返啲錢；有投資成份嘅，供滿時除咗可以攞番本金，仲有分紅，又有保障。」
「呢個世界冇免費午餐，你供嘅錢有部份會落咗基金經理個袋，但唔保證基金經理投資成績好過你自己買股。所以除咗買保險，我建議你月供股票幫BB儲錢，你知我最鍾意叫人月供股票，可以唔使理幾時買入，反正平均成本法，只要你揀嘅股有穩定增長，你嘅買入價一定低過市價。只要揀隻好股長揸，回報唔見得少過買基金。」
好股長揸月供最抵
Dick：「最大問題係我點知邊隻係好股？」
「最穩陣買滙豐（005），佢雖然過咗高速增長期，但舊年全年股價都升咗14.5%；想回報高啲可以諗A50中國基金（2823），舊年升咗1.6倍，我估08奧運前大陸股仲有運行，之後你咪換過隻股票供囉。至於我自己就供緊港交所（388），我睇好香港金融中心地位，而且大陸仲有咁多巨型企業透過香港『走出去』，隻股舊年升咗1.7倍，有幾多隻基金可以有咁好成績吖！」