星俠經常有睇港交所（388）的SDI，而且搵到炒股靈感。
中華煤氣（003）位於國內的10個燃氣項目，獲百江燃氣（1083）睇中並提出收購。其實有關消息已眾所周知，而百江將於本月15日舉行股東特別大會，投票通過有關交易。
其實距離該EGM半個月前左右，根據港交所SDI資料顯示，有個美國退休基金TIAA-CREFInvestmentManagement於1月30日，以3.75元增持450萬股百江燃氣股份，總共持有相當於集團已發行股數5.34%。
睇好新購業務
百江有芬佬臨「舉手」前買貨，當然要認真對待有關資料背景，星俠發現該退休基金，一向熱衷玩長線投資，今次增持百江至逾5%以上，應該係看好有關收購後的業務前景。既然有芬佬加碼，股友現價何妨跟進？
百江是次收購的10個項目位於山東及安徽兩省，交易完成後，集團連同現有位於四川省及中國東北的業務，將擁有遍及全國32個城市共35個管道燃氣項目。
按集團截至06年6月底止中期業績，管道燃氣零售佔整體營業額比重，已由05年同期的5.7%增至14.8%，反映管道燃氣業務正步入收成期，若有關項目收購完成後，未來增長更如虎添翼。
方星俠