冠軍（092）同上周推介嘅泛海（129），業務唔同，但一樣平得交關。冠軍06年度（6月止）純利5.5億銀，增長20%，得3倍PE，主打業務又喺祖國，有ChinaConcept，咁平嘅電訊科技股，去邊處搵？去年純利比起99、00年科網時代，分別增長195%及80%，但現價（1.53元）就相對科網潮10蚊，足足跌咗84%。科網潮年代，電訊股包括軍冠狂升，可能係非理性亢奮。但冠軍喺科網潮以嚟，幾乎年年增長，家陣業績仲實淨，股價咁殘，可能又係非理性悲觀情緒作祟。鐘擺原理，冠軍遲早獲大平反。
冠軍有隻公司輪（564），本月26日到期，窩輪同正股，短期可能又有互為牽動關係。買冠軍，現價翻一番到3蚊，PE都係6字頭，升兩倍，PE都未過雙位數，係07年電訊股中嘅發達黑馬。
前周推介銀創（706），狂升9成。冠軍唔係同類股，但都係科技股，隨時翻版。
泛店隨時向上爆
泛店（292）現價（0.12元）NAV折讓達到64%，股價仲殘過03沙士期，係NAV折讓最大兼最低殘嘅酒店股。同阿媽泛海一樣，泛店咁大折讓，唔通酒店資產又係唔值錢？
又泛店經過1年蟄伏，250日線已經同各組主要平均線，叠到齊葺葺，呢類型格，一係唔爆，一爆不得了。博泛店翻半番到0.18元，NAV折讓貼近47%，實情大把收窄空間。
錢雋