有錢人要保住自己嘅生意王國，最緊要係培養第二代接班，好似「痕地」同埋「祥光」呢啲大企業，當個太子或者公主學成歸來，先安排佢哋返屋企公司由低做起，然後就由幾個太傅，扶助佢哋慢慢上位，呢班第二代點樣由低做起嘅呢？不妨睇睇太子女Candy前幾年嘅故事！
話說當年Candy讀完書後，就入咗家族嘅傳媒王國由低做起，低成點？由記者做起。話晒嬌嬌女一名，做副刊最好，但為咗他日接手王國做準備，於是跑埋財經新聞吸收吓經驗，咁Candy點跑新聞呢？
逢周五飲紅酒
話說，一班老外中高層將兩部採訪車其中一部留畀Candy，安排車唔緊要，最正係有次賣地，要Candy搵地產經紀做回應，高層叻到打電話去agent度落order，話明太子女落緊嚟做訪問，記得畀啲精警嘅quote，唔好令人唔高興。
既然要接班，Candy都好識做，逢星期五就搞個FunFriday「慰勞」同事（其實係下屬），飲吓紅酒，食吓到會咁，但次次都係六七點記者最忙嘅時間開餐，於是只得中高層受惠，「平民」喺趕完稿後，連春卷皮都執唔到！
「英軍」公主學藝
不過，靚女始終係最着數，由於Candy貌似全智賢，於是上上下下男同事，對呢啲現象冇乜意見。咁，啲「民女」點睇呢？只可以講自己條命唔好！
不過咁，唔係個個第二代都係咁樣「由低做起」嘅，好似「英軍」小公主去Candy嗰度學藝，真係低調行事，跟大隊一齊落手落腳做，兼冇額外待遇㖭！
[email protected]