百佳將油魚當鱈魚賣，搞到唔少市民食到屙油，事件擾攘個多星期，越揭越臭。事態發展至今，仲未有人或機構企出嚟為事件負責，班網友好似追連續劇咁，有啲更聯想到近期發展商嘅賣樓手法。
tfanman喺《香港討論區》度寫咗句相當精警嘅對聯：「油魚偽冒鱈魚──一褲都係，上車盤充當豪宅──一殼眼淚。」abcpqr即時回應話：「食假魚屙油，買假樓屙血。」LMB睇完之後覺得：「呢個比喻真係一流！」
冇人迫你買 只係昆你買
除咗誇讚tfanman有諗頭，個別網友對事件亦有自己睇法，好似abcpqr就話：「一貫做生意手法，不必大驚小怪，食你唔死係你夠運，屈你唔死係你命硬！假貨繼續賣，冇人迫你買，但有人昆你買，一切程序合乎法律。」數碼王子都話：「呢啲都係包裝伎倆！」見冇乜人撐自己，abcpqr再補充兩句：「賣假魚或者賣假樓，都係唔受監管，任由用家屙油或屙血，誰是話事人一目了然。」
japanboy亦自創對聯作總結：「樓主對聯及其他朋友的比喻很公整，妙極，我也學人拋磚引玉：買餸去百『街』，好易揩；買樓搵長『亁』，好易香。」
就上述事件，問過幾家發展商睇法，不過全部以油魚事件尚未有結論為由，拒絕回應。喺度奉勸買家，不論買魚定買樓，搵間商譽好啲嘅就最安全。