農曆新年就到，傳統上過完年就係樓市嘅旺季，經紀呢排已經開始出動向各準買家洗腦，eechuen好明顯係其中一位，佢喺《香港討論區》話：「呢排睇樓，個個經紀都話要農曆新年前買樓，唔係會貴好多，成日話要快啲決定，講到好似𠵱家唔決定係我嘅損失。」所以佢好心急問大家覺得樓市會唔會真係升？
睇升總有藉口
70幾個回應中，極大多數都覺得係經紀嘅推銷伎倆，勸eechuen唔好耳仔軟，java2好似好有經驗咁話：「基本上，任何時候佢哋都會話樓價遲啲會貴，所以過咗農曆新年後，佢地會話『要復活節前買樓，唔係會貴好多』。」Lscat就宏觀咁諗：「樓價唔會一下子大幅飆升，𠵱家即使賣地高價成交都谷唔起個市，新年呢啲『唔啦更』嘅消息又點會谷起個樓價！」
fwho就用10年前好景嗰陣嘅經驗教路：「96、97嘅時候，由於樓市好，你想睇樓，搵經紀要排期；𠵱家明知我唔會買樓，經紀都間唔中打個電話嚟，話有筍嘅盤叫我睇吓，帶啲客睇十次八次，個市會大升？唔好呃人啦！」邊個啱邊個錯，真係講唔埋。
其實一直以嚟，之所以會出現農曆新年後樓市特別旺，好大原因同發展商習慣過年後推盤有關，新正頭樣樣嘢都講意頭，農曆新年後開紅盤，幾乎已經成為樓市嘅必然慣例，不論樓市旺淡，大家都好樂意去接受呢個意頭。
好似舊年咁，雖然正值加息周期，新春假後長實（001）賣葵涌雍雅軒，泛海（129）亦推油塘鯉灣天下，個市氣氛都唔錯。今年雖然好似冇乜矚目全新盤，但就有幾個中上價貨尾盤會喺新年後出動，唔多唔少都影響到一手造價，準買家不妨睇定啲先。