臨近新年，一眾片商都有多套DVD等住推出，招呼一班餓咗好耐嘅戲迷，港產片方面，今個星期就由劉德華主演嘅《墨攻》最有睇頭，仲出埋一個以木盒做包裝嘅特別版，相信唔少戲迷都打算將佢帶返去慢慢煲，不過點煲先至最有味道？今個星期我哋就搵套平民化影音組合煲碟，睇吓$10,000樓下貨仔睇《墨攻》質素如何。
記者：許福合
攝影：楊錦文
未係高清 但經濟夠震撼
好多人都話睇DVD用42"電視啱啱好，畫面有番咁上下，不過無論42"Plasma定LCD-TV，名廠起碼2、3萬起標，真係唔係人人玩得起，今次介紹呢隻HPCPP-42SCPlasma電視，牌子雖然唔多Hit，不過勝在尺寸夠大，睇戲時夠壯觀，鍾意Plasma畫面嗰種立體感嘅戲迷會份外滿足，最重要係價錢只係$6,399埋單，呢個價錢同好多台製32"LCD-TV都有得比！價錢低自然唔可以要求咁多，佢未支援高清規格，解像度只有852×480，但基本功能齊全。
為令到睇戲有更佳享受，配番個TEACDR-H300，就可以有靚聲靚畫，以同類微型組合來講，備有HDMI介面甚為少見，畫面能輸出1080i及720p，聲音方面就可以大玩DTS、DolbyDigital，試碟時覺得整體聲音雖然柔和不足，不過對於《墨攻》描寫戰爭場面為主電影，較「硬」音效又有另一番唔同效果，尤其千軍萬馬，戰鼓響起之時，的確氣勢非凡！唔知係咪令用家更方便襯電視，機頭有銀同黑色可選擇，着重外觀戲迷亦照顧得到。
查詢：阿二無線電（23936381）
「暖1」是攻城最佳設定 可惜無NR
講到最佳畫面設定，仍然嗰句，好睇自己心頭好，不過基本上仍然係先設定好色溫，PP-42SC本身提供有標準同多組設定，睇《墨攻》時，標準色溫略為偏黃，畫面唔多靚，但轉上用「暖1」設定，效果都幾好，再來就要數到亮度，因為唔少片中場面有「爆」情況，最好略為調暗，而全片基本上光度適中，唔會有黑到睇唔到嘢情況！
有影音發燒友睇到《墨攻》畫面，就話「畫面始終唔及荷李活電影。」細問之下，原來佢指畫面唔得滑，即係多Noise，於是筆者就打算開埋NR睇質素，可惜PP-42SC並無提供呢個功能，其實全片只係某幾個段落畫面較粗，整體尚算不俗。
色溫比較
故事以戰國為背景
全片基本上係劉德華個人騷嘅《墨攻》，故事背景遠在二千三百年前戰國時代，當時身為墨者的劉德華，應小國梁城梁王要求，前去協助防守趙國攻擊。其實趙國目標並非這個小城，十萬兵馬原本攻打燕國，只係想「順手」將梁城收服。梁王原先希望墨家能派出抵擋十萬大軍精兵協防，誰知來嘅只係單人匹馬嘅革離。無可奈可之下，梁王惟有請革離做主帥，革離果然有真材實學，利用火攻、地形及不同戰術，屢屢將趙兵擊倒，令梁城上下尊敬佩服，只有一個人例外，梁王怕軍民皆向革離，自己地位不保，於是對革離大起殺機！
必試位
買咗隻DVD，梗係想知有咩位置係必睇必試，以下就逐一話你知！
兵臨城下
趙軍人強馬壯，十萬大軍壓境，難怪梁國上下嚇到幾乎要獻城。
民眾逃難
由於強弱分明，加上梁王聲譽麻麻，收到消息趙國要攻城，老百姓自己亦要走難。
迫做卧底
走難嘅人之中，有人唔好彩被趙軍發現，並以妻兒做要脅，被迫做卧底，探索軍情。
大軍攻城
趙軍終於進攻，不過梁軍得到革離領導指點，亦守得有板有眼，並非全無還手之力。
獲得民心
老百姓最實際，邊個有能力保護佢哋自然獲得尊敬，革離係擊退趙國功臣，更捧為英雄。
夜探敵情
為咗查探趙軍布陣，革離同逸悅夜探敵陣，被發現後被追至跳崖，逸悅差點浸死。
挖地攻城
正門攻唔入，趙國改走地底，預先挖地道，不過因為被革離得知，反中埋伏，傷亡慘重。
逃離梁城
梁王因忌才而起對付革離之意，免他威脅自己地位。革離得到太子協助，終逃出梁城。
趕盡殺絕
革離逃出後，對於曾經對革離示好嘅人都被清洗，而逸悅更慘遭割喉之刑。
空降趙軍
估唔到趙國咁「先進」，竟然派出傘兵，不斷射火箭，掩護趙軍進攻。
普通版
DVD$95
木盒特別版
DVD$99
查詢：DVDPro
（23326326）
