雖然中央掛住㩒低個股市，但對房地產市場都冇放鬆，嚴格執行土地增值稅，喺呢個風頭火勢嘅時候，3年前將太平協和私有化嘅汪世忠，計劃將大陸資產包裝上市，間公司仲要改名做「中國地產」，慌你唔知佢嘅賣點。
硬銷「中國地產」
對於今次汪世忠捲土重來，網友hk007d喺《香港討論區》問大家有冇興趣抽番多少，但反應似乎麻麻。心水清嘅terryctl1話：「人哋大陸地產股嚟香港上市，唔多唔少為個名，資產點都會有啲折讓；而汪世忠本身就係香港人，3年前以五成折讓私有化，3年後就以300%溢價上番市，大家買唔買嚟等佢2010私有化呀？可能今次好好人，只得30%折讓。」
平收貴放嚇怕人
small_yi好決絕咁誓言：「唔抽，驚佢平價私有、貴價上市。」
都有啲網友「唔針對人，只針對事」，好似驚中央再度出招嘅lam233話：「阿爺打壓地產，仲入？」迷語人：「見到中國有好多樓起到一半停工，冇信心。」disgust.com.hk抵死咁講：「中國二字，值80分；地產二字，值20分；但四個字放埋一齊，負100分。」
cbt001同69gambler就分別認為「中國」兩個字，同保薦人美林係信心保證，暗示會支持咁話。
睇番資料，喺03年10月，汪世忠出價9億元，將持有香港、內地同泰國物業，但股價長期低迷嘅太平協和私有化；每股作價0.65元，較停牌前作價有51.16%溢價，但與資產淨值相比則有64%折讓，獨立財務顧問呼籲股東投反對票，但私有化最後都「夠飛」通過，小股民當然唔多高興。
東泰證券鄧聲興認為，過去太平協和私有化作價折讓過大，對小股民不太公平，但近年內地樓市已升值不少，汪世忠是次提高招股資產價值亦無可厚非。他指中央雖然未完成房產調控，樓市短期仍受壓，但長遠依然看好，散戶可小注抽股。