有沒有一矢中的、還是女方高舉堅硬蠍箝反擊？這場愛作戰的最後戰果，我們並不知道，但知道的是，他們是對很有趣的鬥氣寃家。
黃宗澤揚言喜歡胡杏兒開心爽朗的個性，但她太強太硬淨，像一杯沒糖沒奶的齋啡，感覺又甘又勁，他對抗硬的方法只有軟，「我豬、隨和、冇所謂」。
軟腍腍vs硬倔倔，那管誰食住誰，開心就好。 撰文：朱倬誼
自認夠豬任蝦唔嬲
黃宗澤和胡杏兒的緋聞傳了接近兩年，近月他們再被踢爆結伴買眼鏡、男方上女家香閨玩煮飯仔，情侶關係昭然若揭。
上星期問黃宗澤，喜歡的女朋友會是哪類型？他想也不想就說：「我鍾意開心嘅人，唔好苦口苦面，有乜攤出嚟講，爽朗啲，大家相處舒服。」其實早於個半月前，記者問他覺得胡杏兒怎樣，當時他說：「杏兒係個開心、爽朗嘅人，對住佢唔會悶到冇嘢講，起碼有偈傾。」答案相似度達九成九，記者跟他重提舊事，他聞悉後不禁大笑：「係咩？有咁講過？咁……都仲有好多嘢嘅，夾唔一定係拍拖。」
「我冇駁嘴㗎」
緋聞熱炒有增無減，空穴來風，未必無因，黃宗澤說他和杏兒沒拍拖，說服力其實很低，「人哋點講，我哋點聽，係人哋覺得啫。」他這樣說。但對於緋聞，他是接受的：「𠵱家求其影到張相都話係，可能係風氣，又可能緋聞係人氣，我唔介意緋聞，但唔好太過份。我最怕人哋話我花弗，惟有慢慢改變人哋嘅睇法，拍拖都要啱、真係相處過至得。
「我都接受咗，緋聞係藝人一部份，又唔會太過驚。喺TVB嘅異性當中，佢確係最傾得埋嘅異性朋友，但我唔了解佢有乜嘢優點同缺點，要時間至了解到嘅，所以冇突破，同做女朋友仲差好遠，𠵱家做嘢咁鬼忙，都冇時間，邊有時間深入了解吖？佢好鬼硬頸㗎，對住佢都唔覺得佢係女仔。」
到底胡杏兒是不是黃宗澤的杯中茶？他卻打趣說：「唔係，佢係齋啡，冇糖又冇奶。夠甘、夠勁，佢硬淨吖嘛。」杏兒予人的感覺幾強，黃宗澤說他總是被恰的那一個：「佢係蝦我㗎，佢硬頸呀，但大家朋友，我冇駁嘴㗎。」即是食住你吧？「冇話食唔食，唔知，可能我豬、隨和、冇所謂。」
不抗拒拍拖
無綫對簽經理人約的藝員管教甚嚴，黃宗澤如果真的戀愛了，是不是都不敢認，硬要走地下情？他說：「又未至細膽到咁，影到嘅時候，你哋會知，唔會決絕唔認唔畀影，拍拖嘅嘢，唔會太強求，又唔會百分百拒絕，成日覺得天要畀一段姻緣，無論係點都冇得推，想有事業基礎至拍拖，結婚生仔有老婆，係人生必經階段啫。」
