前稱偉誠嘅澳科控股（2300）周三成交大增至8155萬股，如此成交量的確好少見，原來係該公司一名董事李偉波，於當日透過配售安排，以約每股4.97元在市場配售8046萬股或10.27%權益，涉及金額近4億元。出售股份後，李偉波持股量由原來12.82%，下降至2.55%。
新聞將焦點放在董事沽貨套現，忽略咗其實係前大股東逐步淡出，將公司股份逐批轉手畀澳洲上市公司澳科Amcor。呢間澳洲上市公司，早於04前隨同公司上市獲配股成為策略投資者，其後再於去年2月在場外獲配2.17億股，每股3.45元，一躍而成為大股東，假如今次以每股4.969元批出呢80球貨證實係Amcor接埋，其持股將超過50%。
澳科股價喺去年3月曾見過9.15元，跌足1年後上月曾低見4.24元，跌幅超過一半，睇番股權變動，曾持股逾50%嘅基金如PMA、富達及德銀，紛紛減持至不足5%。
集團06年度半年業績唔多好，雖錄得8350萬元盈利，較去年同期增加20.7%，營業額增1.3倍至4億元，但每股盈利就下降12.9%至0.128元，毛利率及純利率俱跌，當中純利率跌幅達7個百分點，難怪基金會先沽為快。
隨着股權易手，由澳洲佬話晒事之後，相信業績有改善空間。呢間公司一向有大行跟開，睇得最好係瑞銀，自澳科增持附屬，向內地第2大煙草商紅雲集團供應香煙包裝紙印刷嘅偉建之後，獲該行調高每股盈利預測23%，維持澳科買入評級，目標價維持11.2元，中期業績後調低至9.9元，較現價仲有4蚊水位。此股PE不過10倍左右，可列為候低買入對象。
歐陽風