某啲上市公司董事減持或增持股份，唔理個量多定少，都會惹人聯想，好似李家二少楷楷賣唔成8號仔後，七度增持電盈，大家就認定佢係驚俾網通踢走，所以加碼令到自己個主席位坐得穩！咁如果《經濟日報》靈魂人物、有如股海明燈嘅石Sir石鏡泉減持經濟日報股份，又代表咩呢？
根據聯交所數據顯示，作為經濟日報執董嘅石Sir，1月30號響市場以每股2.25元減持咗500萬股，令持股量由1100萬股（2.55%）跌到600萬股（1.39%），套現1125萬元！
石Sir咁做，唔通佢唔睇好《經濟日報》前景？佢哋份報紙銷量基本上同恒指走勢掛鈎，個市好就梗係賣多啲，個市唔得，仲邊有人需要咁多財經消息呢？石Sir呢個減持舉動，會唔會係跌市先兆將來先知！
不過，可以肯定嘅係，噚日經濟日報收市報2.4元，升1.27%，石Sir少收75萬，係咪放早咗呢？