幾日前，手機界出現開埠以嚟第一宗因改機被判罪成嘅新聞，改機歷史已有一段長時間，為何偏偏「謝利記」呢一代會觸犯到法律問題？多年前，N、M、S、E字頭，邊部機未被人改過，加大鈴聲、英文介面轉成中文等，甚至乎上多幾小時課，自己買架生返屋企拆都搞得掂。
問題來了，以前大家仲未敢明目張膽，但近兩年膽子就大咗。據說由日版機轉成港版機嘅技術，起初由俄羅斯、羅馬尼亞嘅「專才」傳入（竟然唔係大陸！），香港改機佬學識之後，再變相成為一招獨門絕學，不少水貨商還紛紛慕名而來搵「機神」改機。呢次「日版903SH中文版事件」只係個觸發點，將侵權行為變相成為一項「專利」，這才更嚇人。
文：徐柱共
Bytheway
看深點，「機神」改得好，是侵權；但「機人」大有人在，他們改得不好，會侵犯人身安全，這是人神之別。
這次「機神」改機是否涉及侵權，留待法律界去爭論，但香港很多「改機人」都是一知半解，見步行步，即「亂嚟」，非常危險。
上方圖片是拆開事件其中一位主角SX833，我不懂維修，但知機內一粒不知名功能的晶片會發出高溫，廠方用鐵罩來保護，外露於機底殼，保護罩就充當散熱器，再貼上膠紙，電池位亦有防短路保護，設計很精細。
而我學足改機佬程序拆SX833，最後，所有保護貼鬆掉，插卡鎖移位……死火，鏡頭組太接近電池，只要一個出錯，電池可能短路，繼而褲袋開花，子孫根也不保。