本港大學生之英語水平（拉勻嚟計，一啲尖子嘅英語好到頂呱呱，左丁山與賓架Ｗ見識過，自嘆自己係新鮮人嘅時候，遠遠不如）受人詬病，已不是新聞，想唔到去海外留學，仍然俾人彈。學陶傑話齋，出國留學，千祈唔好留戀唐人街，只與香港仔女交遊，唔好日日講廣東話，英語自然有進步。不過呢樣嘢說易行難，總會物以類聚，留學幾年，英語並無寸進者，大有人在。
呢呢，澳洲莫納西大學人口統計學家比勒爾做一個調查，發覺留澳大學生之中，新加坡、印度學生英文最好，不達標準比率只有17.8%與17.3%，其次係馬來西亞（23.5%）與巴基斯坦（24.8%），香港有（42.9%）學生不及格，竟然差過素來英文水皮嘅日本（36.8%）與印尼（32.9%）。最差嘅係泰國（50.9%），韓國（55.5%）。由香港去澳洲讀書嘅大學生真係差啲喎，唔通以後留澳洲大學生返嚟都要考過IELTS，先至可以聘用？（按香港嘅大學生考IELTS平均分數大約係6.5，以九分為滿分）。
同係在香港讀小學中學，點解大學生嘅英語水平可以差好遠，令人唔多明白。賓架W頒獎金畀一位做英文presentation得獎嘅學生，左丁山聽呢位女生講英文，以為佢係自加拿大或者英國返嚟，或讀過國際學校嘅，誰知不然，佢土生土長，冇跟隨父母移民，在一家可以稱之為「一班尾，二班頂」嘅名氣學校讀書，點解講英文講到好似鬼妹一樣，連佢嘅導師（英國人）亦讚賞不已？女生話：「靠苦讀苦練，中學先生教得好。」一言以蔽之，靠自己，毋須賴三賴四賴地硬。
呢位導師教presentationskills別有一套心得，喺中環好吃得開，唔少賓架搵佢做「私家導師」，可惜左丁山搵唔到公司出公數搵佢補習或者上堂，唯有聽佢講幾句心得：就係語言精簡，句句到肉，不作狀，不誇張，注重eyecontact（以克林頓演講時嘅眼睛動作為參考，以本地大老闆公開講話讀稿嘅表情為戒），對鏡練習多次，自然會進步。導師話估唔到佢啲學員講英文講得咁叻。唔知有冇人話畀佢知，啲學員全是英語尖子呢。