噚日一輪嘴讚完Plasma嘅色彩層次同反應時間，講到好似無敵咁，但因乜解究家陣周街賣嘅係LCD-TV而唔係Plasma？好簡單，只好怪罪Plasma存着太多先天不足！首先係解像度，先天性受每點Pixel體積所限，首先屏幕尺寸不能低過32"，潮興嘅擺房睇碟已經唔使諗（除非你間房超大！），第二係解像度不足，好難出到1,920×1,080嘅高清畫面，就算如筆者那部LG42"，都只得800×480，睇DVD當然Fit晒，但一駁XB360、Blu-ray等高清玩意，就真係有點「浪費」。幸好早排已有幾間廠突破呢個樽頸，令Plasma都出到FullHD，不過屏幕尺寸就起碼要50"，七皮嘢走唔甩！最令筆者擔憂嘅，係Plasma跟傳統膽機電視一樣，存在發光磷粉問題，日子一久色彩會漸淡，更致命係烙印（Burn-in）問題，長時間顯示同一畫面，影像會殘留電視，更甚者將永不消褪，所以細心留意嘅話，電視台嘅Logo均採用半透明，盡量令到每點Pixel顏色都時刻改變，唔怕留印，但對打機一族嚟講，錶板、數值表等位置不變嘅情形就束手無策，若然你屬喪煲機迷，每天打六小時，日復一日持續下去肯定會後悔，小心！
文：高清俠