台灣音樂才女許瑋倫日前喺台灣發生嚴重車禍喪生，許家決定下周四搞家祭，下周五搞瑋美絕倫追思音樂會。許瑋倫舊愛周渝民（仔仔）嘅經理人話仔仔未決定會唔會出席追思音樂會，但許瑋倫另一舊愛李威就講咗唔會去，李威噚日接受電話訪問時話：「已傳簡訊給許媽媽，他們很辛苦，我不會再去打擾。」
仔仔飆車忘憂
仔仔雖然未有去靈堂拜祭舊愛，但佢噚日就託人送咗花圈過去。許瑋倫死訊傳出後，據知仔仔情緒好低落，連日都匿埋喺屋企。佢前晚破關而出，由朋友開車送咗去女友徐熙媛（大S）家，仔仔睇落好憔悴，連鬚都冇剃，問佢有冇同許瑋倫嘅家人聯絡，佢好細聲咁答話：「謝謝，我有透過朋友持續與他們?絡。」
大S前日喺台灣出席《康熙來了》節目，佢話仔仔呢幾日心情唔好，𠵱家透過朋友安排稍後到靈堂上香，但大S話自己就唔會去。
另外，仔仔噚日獨自離開徐家試寶馬新車，唔知係咪心情差，佢開車時開得好快。至於當日身兼司機兼助手嘅林怡妏，涉嫌犯錯導致許瑋倫喪生，警方仍調查緊，所以限制佢出境。
