$108食到啲乜？1個人豪食1餐迴轉壽司隨時都要啦！不過喺大圍「三和」，$108就可以食到原條10"長嘅BB油甘魚，點食法？當然要厚、薄切做刺身！今次仲示範埋甚麼是活造，魚身微震、魚嘴還將開將合，上枱有如立體雕塑品，百零蚊點睇都值！
記者：朱崇德
攝影：譚盈傑
Model：Naomi
活造BB油甘$108
係呢個時間先有BB油甘魚，過咗3月魚身重過2斤，日本嗰邊會等到過夏天，魚身再大啲先賣，就唔會咁抵食；好多人話靚油甘好味過拖羅，「油甘魚味重，魚味濃，拖羅就食佢溶口感同肥重油脂；兩者分別有如梨之清爽，同菠蘿味道重的分別！」刺身上枱有厚切、薄切，厚者食其魚味，薄者食其鮮爽，食出兩種不同風味；另加$15，仲可以用魚頭滾個麵豉或雜菜豆腐湯。
魴囗刺身$150
魴囗做刺身同油甘差唔多，都係食佢清甜爽口，不過相對油份會比油甘更少，食落會更爽口，一般做法都是會薄切配酸汁，大廚特選穀物醋，味道唔太搶，更能帶出刺身的魚肉清香。
針魚刺身$130
呢度連日本飛機貨針魚都有得食！由於魚身較幼，肉身較削，所以特別做厚切，口感會鮮甜好多；每片刺身會夾一片薄荷葉，再砌成花葉圖案，除咗美觀考慮外，入口同食，會較傳統的酸豉油，更能保持肉身原味之餘，亦能帶出魚肉鮮香之味。
價錢平益街坊
木趟門半開，傳來陣陣魚肉、海產鮮香！開業1年雖然冇乜食書、食評介紹，鼻哥直覺話畀我知，呢間舖「靠得住」！
坐低搵侍應點菜，一嚟就叫我來一客刺身，心諗劏人麼？「我哋呢啲主要做街坊生意，價錢比市區平成半有多；出面一般BB油甘刺身，大約做緊$220-$230，我哋$108就食到！」
等咗十零分鐘，上枱駭然是一盤有如「日本盆景」的油甘刺身！碎冰、冷石、小花、綠葉，百零蚊真係有咁嘅享受？隔籬枱食客見到，都忍唔住攞部手機出嚟影相；嗰刻心想，係咪畀錯我，叫經理過嚟問吓：「我哋嘅廚師做開銅鑼灣啲大場，個個起碼有8、9年經驗，所以慣咗立體式做法。做飲食講求色香味，色相、香氣、味道真係缺一不可！」
紫菜海鮮卷$68
餐廳自創菜式，以三文魚、鰻魚、大蝦配鳴門卷及蘆笋作餡，外包紫菜再炸成天婦羅；入口甘脆又帶點紫菜的香氣，食到入心位，海產的鮮嫩撞上蘆笋的脆口，撞得好過癮。
軟殼蟹米紙卷$48
越南米紙包裹着甘脆的天婦羅軟殼蟹及青瓜絲沙律，同紫菜海鮮卷完全反其道而行，玩外軟內脆！再拌以自製的芝麻醬汁，清爽又惹味。
食客有Say
Ken、Yammi：一個星期會嚟食3次，因為真係好平，尤其刺身最抵食。
廚．私密語
好多人未必知，冬天係日本料理店嘅淡季，因為香港人呢個時候最鍾意係打老邊同煲仔飯！不過呢個只係唔識食嘅表現，主廚羅記話：「一般客誤以為魚生呢類生嘢夏天先啱食，其實錯晒！須知魚產在冬天季節先係最當造肥美，夏天好多魚會瘦啲冇咁好食！」
鏡頭背後
Naomi影相時見到條魚割咗忽肉都仲生勾勾，可以隔一陣再食過，佢話真係大開眼界呀！知道乜嘢係終極新鮮！
睇路搵食
三和日本料理（26090990）
地址：沙田大圍金禧花園商場115-116舖
座位：50個
營業時間：
星期一至五11:00am-3:00pm、6:00pm-11:00pm
星期六、日及公眾假期11:00am-5:00pm、6:00pm-11:00pm
交通：大圍火車站A出口，直行兩個街口至金禧花園商場。
