國內股市好似食咗瀉藥，跌個不停，中央話要「調控」股市，唔係要「打擊」股市，明顯係要為呢排啲官員嘅言論解畫，點解要解畫，因為股市炒到癲，固然有危機，但個個股民心慌慌掟股票，萬一失控，後果都可以好嚴重，開放金融市場配合全國嘅發展係大方向，係國策，不能退，如果打沉咗個市，好多政策都行唔到，見到A股同B股係咁跌，冇晒承接力，你話點會唔驚？
解畫嘅內容仲包埋心理上嘅安撫，話係出於善意嘅政策，呢一點冇人會懷疑，專登搞冧個市，有乜着數？不過，「善意」唔係就代表「可行」、「有效」，好多領導人，中外如是，包括埋前特首阿董，都可能帶着菩薩心腸引你去地獄，好心做壞事，呢一點所有領導人都要戒。咁唔係話股民瘋狂晒唔使理，而係話要小心考慮處理嘅方法。
中資股唔成氣候，只可以炒個別。至於個市，連續升咗兩日，破埋條10日線，但氣勢仲係唔夠，睇吓下禮拜有冇大成交挾個市上去，不過，上禮拜五嘅裂口阻力都有好大壓力，昨日試咗兩次都上唔到去高收。
新地C輪4638：呢兩日地產股係推個市上去嘅動力，長實（001）再逼近110元，新地（016）明顯落後，昨日先至炒上嚟，企喺98.15元收市，睇嚟新地冇咁失威，俾長實拋離咁多，破咗101元之後，都會踩油試110元。
新地C輪4638昨收87仙，槓桿率11.3倍（有效7.3倍），對沖值0.64，仲有4個月先到期，溢價4.5%，唔算貴，正股可升上101元，4638應該升到1.06元，正股上試110元，隻輪應該唔會低過1.75元，呢個價買，正股跌穿96元止蝕。
俊樺