投資股票，眼光準、肯做功課，加埋好彩食正個勢，回報可能幾和味，但唔知散戶捨唔捨得將喺股市賺番嚟嘅錢使咗去呢？
Biru就喺《香港討論區》問咗個咁嘅問題，佢自己好老實咁話唔捨得，「舊年我喺股票賺到嘅一成，都唔捨得用嚟旅行，因為人工少又要畀家用屋企，好難儲到錢，想留番嚟買股賺多轉。」
寃枉嚟 瘟疫去
網友Lovehang好快咁留言話，梗係要使啦，「搵得嚟、使得去，其實買股票都好辛苦、好傷精神！」而PX330就話：「賺咗錢起碼會用三分一嚟獎勵吓自己，咁先會有動力繼續落去。」
Thomastiger亦答嘴：「做人要及時行樂，有乜嘢想做就去做，搵錢有大把機會。」
Calvinling0803就學咗前財爺梁錦松嘅口脗：「用咗嘅錢先至係你嘅錢！」網友全線做淡就將賺嘅錢買咗架十萬蚊左右嘅二手寶馬；而2000Graduate就用咗三分一嘅錢，去咗一次日本同一次歐洲。
不過，原來唔少網友都唔捨得將喺股市賺到嘅錢使咗去，反而會再加碼繼續投資落去，忍俠老苗講：「上年贏咗幾萬蚊都唔捨得用，攞嚟再投資，希望今年又贏幾萬。」
Jackymli就話要不斷喺股票賺錢，等將來退休後有着落。Kidd01001就冇諗得咁長遠，趁𠵱家股市旺盡量搵多啲，等熊市先慢慢使。He-Man好抵死咁講：「一定係錢搵錢先至過癮嘅！」
賺錢難 慳住使
Chinahk30提咗個建議，「基本上我用嚟投資嘅錢，同用來消費嘅錢係完全分開，即係投資賺幾多、蝕幾多都係投資戶口嘅事；而消費戶口就全部用嚟使，有多就使多啲，唔夠就慳啲。每個月除咗必要開支，我會將一部份錢存入投資戶口，剩低嘅就會入晒落使錢戶口，所以大跌市我唔會使少咗，大牛市亦唔會用多咗。」
睇落似乎幾理性，散戶不妨考慮吓。