藝人曲折離奇的神秘私生活，從女子組合2R成員黃婉伶（Race）身上足可印證。去年她被指秘密下嫁星洲富商陳靖諧，事後她連聲否認。Race早前和一名有如複製版陳靖諧的高大男子歎咖啡兼蒲夜店，黐實連踩三場，全程無視同行的電燈膽胞姐黃婉君（Rosanne）及女性友人，最後男方更登堂入室，直闖Race香閨。
女子組合2R成員Race去年被指兩年前已和39歲的星洲億萬富商陳靖諧結婚，雖然婚書上新娘姓名與Race相同及同樣認識陳靖諧，但Race否認已婚，即使面對種種巧合，上月她還是照樣跟男士約會，不過奇趣的地方卻是男伴的樣貌與身高六呎的身形，都激似陳靖諧。
送玫瑰猛傾偈
平日甚少夜蒲的Race當晚難得出山，與「複製陳靖諧」、胞姐Rosanne和一名女伴一行四人，約9時先抵中環Starbucks歎咖啡，其間Race與複製陳靖諧同坐，後者還將一支紅玫瑰送給Race，又不時以手機為她拍照，二人喁喁細語，有講有笑，傾足兩個鐘才離開咖啡店，由複製陳靖諧截的士，偕三女往荷李活道蒲Tiva夜店。
抵埗後，現場見Race全程無視胞姐和女伴兩個電燈膽，繼續與複製陳靖諧同坐，與他邊飲雞尾酒邊聊天，一小時後由男方埋單，四人坐的士轉蒲Dragon-i，玩到凌晨3時多才離場，坐的士齊返2R西摩道香閨，一直傍實Race的複製陳靖諧滿面笑容登堂入室，至清晨6時也未見他露面。
直認多年朋友
拖仔返香閨後，2R即到日本旅行，至日前本報記者終聯絡上剛返港的Race，她在電話中說：「個男仔係我美國嘅朋友，佢同另外個女仔係情侶，嗰晚佢哋嚟咗我哋屋企坐咗一陣，家姐同個女仔係bestfriend，所以特別好傾，你唔講我都唔知自己同個男仔成晚坐埋一齊。」她否認男伴是陳靖諧之餘，也否認對方與陳有親戚關係，她說：「冇關係，佢只係我哋識咗好多年嘅朋友。」問Race會否擔心傳緋聞？她緊張說：「唔好亂講，朋友咋。」
採訪、攝影：娛樂突發組
