近來天氣又再轉涼，外面得10℃，着到成個車胎人都好似唔夠暖。行出街，寒風一吹，嘩！凍到入心入肺。禦寒除了可以着多兩件褸外，食多啲高熱量的食物一樣可以保暖，仲會越食越熱，一路食一路剝衫，大褸都唔使着。
記者：梁學文
攝影：周旭文
Model：Cat
Ristto$108
芝士香炸熱辣辣
㷫烚指數70%
芝士經已好夠熱量，再加上炸一炸，更加熱上加熱。師傅先搓勻肉碎同雞蛋，再加入Mozzarella芝士入爐炸到金黃色。一上枱就好香，忍唔住要即刻放入口，嘩！即刻辣親。吞落肚，一股暖流流入心。
雜菜煎鱈魚$138
魚油好暖胃
㷫烚指數80%
唔好一聽到鱈魚就走人，因為呢度用的是挪威入口鱈魚，保證無問題。師傅專揀比較肥美的鱈魚做菜，因為多魚油好保暖。唔使擔心魚油會肥，因為含大量Omega-3，對身體有益。魚皮煎到卜卜脆，入口一陣香草味。
米蘭式煮牛仔肉$278
牛仔肉加紅酒㷫烚烚
㷫烚指數70%
平時食牛扒多數煎或烤，米蘭式的煮法就係?完再炸。Michele話先要將牛扒?扁，令牛肉鬆化無咁厚，方便入口。再蘸麵粉用牛油煎，牛仔肉入口嫩滑，再配杯紅酒，包保即刻可以除低件大褸。
朱古力火鍋$88起（2人）
甜蜜暖住食
㷫烚指數90%
朱古力火鍋共有3款唔同濃度的朱古力，由63%至75%，如果喜歡食朱古力的，一定要試75%的Barra9，味道最濃。朱古力全部由意大利入口，平時唔係咁易買得到。飯後來一個朱古力、生果、餅亁火鍋，包保熱到出煙，然後再呷一口甜酒，嘩，SoHot！
黑松露鴿胸沙律$98
野味就夠暖胃，食完個身即刻㷫烚烚。最特別係個汁，先將鴿胸肉同鴿骨一齊攪碎，然後再加入紅酒等材料再熬，引出鴿的鮮味。蘑菇沙律清淡，配合野鴿熱且濃味，一濃一淡，一冷一熱好平衡。
車厘茄黑橄欖羅勒全麥意粉$138
主要調味只有辣椒同橄欖，夠Light夠Fresh。雖然呢個菜未必可以好保暖，但係就可以中和到其他高熱量菜的膩滯感覺。黑橄欖入口唔算苦，仲有一種肉食的感覺，愛食素者可以一試。
食芝士好過冬
呢幾日着到成隻糭咁，都仲係覺得好寒，手凍腳又凍。其實要保暖唔一定要着大褸羽絨，最緊要係由內而外，食多啲暖胃食物就係最佳方法。好似食牛奶製品，一般都含高蛋白質，有助製造脂肪，食完點都會暖啲。意大利菜就好多時都會加入些少芝士，來自意大利的大廚Michele話：「大家都知意大利菜有好多芝士，無論Pizza或者一般菜式都會有，食咗肯定暖笠笠。意大利嘅冬天真係幾凍，有時仲會落雪，食多啲高熱量食物真係可以着少件衫。」好多人都會擔心，食得多高熱量菜，好易會變成肥妹肥仔，Michele就話食咩都會肥，最緊要平衡，好似Michele煮的意大利菜，好着重一重一輕，有肉一定有菜，感覺會平衡番晒。
冬天最愛食野味
問Michele喺意大利冬天會食咩?佢就話最愛食野味，兔肉呀、鹿肉呀同馬肉呀咁，統統都係佢嘅至愛，Michele話：「野味好好食，食完會好暖，可惜香港人唔係太接受，尤其係兔肉，食完成身暖晒，着件Tee行出街都得。嚟到香港，我就改咗煮鴿，野鴿由意大利入口，食完效果同兔肉好相似。」講到用料，Michele14歲就開始當廚師，對點揀靚料有一手，堅持要揀最新鮮的材料煮，因為一分錢一分貨，寧願用貴價貨，都唔想待薄客人。
飲紅酒送意式小食
平時去餐廳食飯，想開支酒飲，但係又唔知邊隻好，有時得兩個人又飲唔晒，喺DiVino就唔怕，因為呢度有超過50款紅白酒可以逐杯叫，試多幾款。另外，平日5點收工時間去，仲有AperitifMoment時段，有薄餅、意大利粉等免費供應。
睇路搵食
DiVino（21678883）
地址：中環雲咸街73號地下1號舖
營業時間：
星期一至五12nn-3pm、6pm-11pm
星期六6pm-11pm
座位：60-70個
交通：中環地鐵站D2出口
