啱啱公布話會「做好呢份工」嘅煲呔，之前係咁叫人生三個，但得個講字，冇乜嘢做過，反而商界私底下就做咗唔少嘢。華華噚日收到風，話渣打嘅全職男員工，今個月開始，可以享有五天有薪陪產假，就算領養小朋友（三歲以下），都有同樣福利，又特別為呢班準爸爸送上布公仔（圖），唔知班男同事會唔會因為咁，喺豬年落力製造小生命呢？
除咗渣打，出名福利好嘅美國運通，唔單止男同事有產假，去年尾仲喺公司入面，間咗間房做哺乳室，裏面有齊衣架風筒，方便帶BB返工嘅女同事，可以喺裏面餵奶換片，聞說有咗呢間房之後，就有唔少女同事大肚，睇怕之後間房嘅使用量會節節上升。原來留人才有好多方法，唔係只得加人工。