張家輝夠膽攬女蒲吧?珍珠都冇咁真!因為該女正是他如假包換的honey─1歲大的小B女Brittany。前晚家輝率妻女到中環連踩兩場,一家三口先歎蒙古菜,再轉場蒲吧,玩到近半夜才盡興而歸。難得小B女竟然未有瞌眼瞓,還眼睩睩精靈上鏡,這個BB真蒲得!
張家輝和關詠荷的愛情結晶品Brittany上月剛滿1歲,但小B女人仔細細已經見慣大場面。早於她一個月大時,雙親已帶她見黃秋生和吳鎮宇兩位影帝uncle,上月又隨父母欣賞兒童音樂劇,難怪充滿演藝細胞的小B女前晚被大批記者追訪,一樣眼仔睩睩,淡淡定定。
打扮潮又cute
今次小B女更上一層樓,在老竇家輝率領下夜蒲中環四粒鐘,的確令人歎為觀止。張氏一家在晚上7時多,由家輝充當柴可夫,駕駛寶馬房車載妻女抵中環展開夜蒲大行動。他們泊車後,趕開飯的關詠荷尾隨抱B女的家輝步往蘭桂坊方向,三人竟在車輛間過馬路,匆匆步至雲咸街一家吃蒙古和西藏菜的中菜館開餐,歎足三個鐘後才離場。
當時關詠荷手持B女的芝麻街Bert毛公仔,家輝則抱實女兒,小Brittany身穿粉紅羽絨褸、黑色leggings配粉紅波鞋仔,打扮又潮又cute,非常趣致。當記者拍照時,她更乖乖上鏡,家輝說:「呢間嘢我朋友開嘅,過嚟食飯啫。」他透露因和關詠荷稍後分別開工,所以會請親友幫忙湊女。
坐開揚位置
其後家輝一家三口轉場往奧卑利街蒲OSipHah酒吧,由於他們坐在開揚位置,未幾大批記者聞風而至,在場女侍應即任人肉盾牌擋記者拍照,約大半個鐘後,家輝先行取車,然後將車駛至酒吧門外接妻女,關詠荷則用手遮B女頭部,抱着她齊坐後座,再由老公開車直駛返家。
採訪、攝影:娛樂突發組