王英偉終於決定唔再幫上海姑爺羅康瑞打工，辭咗瑞安房地產副主席兼常務總裁職務，今年5月1日生效。王英偉話𠵱家仲喺瑞房打工，唔方便講去向；而且佢身兼多項公職，都要時間調整吓。市場傳聞王英偉有好多offer，要慢慢揀咁話。
王英偉唔做瑞房嘅消息，舊年底已喺市場流傳，當時話瑞房違規借咗上海社保基金8.75億元發展創智天地項目，王英偉要負全責，羅康瑞第一時間幫佢澄清。近日又傳佢重返恒基地產嘅公司，甚至有人估佢返政府做局長。
王英偉嘅背景的確瓣瓣掂。佢政務官出身，做咗17年公務員，92年做工業署副署長時只有39歲。之後棄官從商，先後加入嘉華國際同恒基中國，2000年加盟羅康瑞旗下瑞安建業，舊年瑞房上市就過檔瑞房。他身兼多項公職，包括港區全國人大代表、機管局董事會成員，最近做埋浸大校董會主席。真係去邊都得。