傳咗一排，TVB噚日終於正式宣布，委任對家ATV前任行政總裁、林伯頭馬李寶安入局做總經理，幫六叔六嬸睇實財政同行政呢兩瓣，咁安哥的加盟對喪煲「爭霸」班師奶，梗係唔多關事，但對無記管理層嚟講，可能意義重大！由六嬸輔助夫君嘅無記王國，未來將由三頭馬車輔政，管理江山！
𠵱家無綫有兩位總經理，一個係負責節目部嘅志雲大師；一個係睇住廣告嘅小強鄭善強。好耐之前負責睇數係由退咗落嚟嘅何定鈞負責，但佢老哥落嚟之後，無總經理級負責。𠵱家開始又有總經理級嘅人揸住盤數。TVB盤數越嚟越靚，相信都係投資界同埋股東嘅合理期望，唔怪得TVB嘅股價前幾日創出58蚊嘅新高啦！
咁安仔入局會唔會同兩位總經理出現「爭霸」局面？睇怕唔會，志雲大師成日要出嚟支持吓歌手同埋藝員，佢主理嗰個專俾人告解同埋流馬尿嘅飯局，似乎仲有排食，應該冇時間踩過界。
至於成日面紅紅怕醜嘅小強，淨係保住廣告增長都夠煩，理應冇時間搞人哋個瓣……一句講晒，響六嬸管治下，佢哋諸位只可以「做好呢份工」！
太傅轉會多出路
講番安哥本身，佢係林伯麗新系的元老，林伯當年買ATV後，搵佢入去一齊食魚柳包兼睇檔，做過一排電視人。另外，佢亦算係無間岳少同至愛建名的太傅，咁自古以嚟，太傅係例牌唔會同太子啱key，所以皇帝仙遊之後，呢啲叔父輩就要告老歸田，但喺現代社會嚟講，就多條可以轉會嘅出路。
之不過安哥轉會又真係幾有「無間」feel。事關翻查資料，除咗啲藝員、乜姐物姐可以無記A記兩邊走之外，響極高層嚟講，兩個台都做勻嘅，佢應該係第一人。
[email protected]