潮流興Crossover，甚至九唔搭八嘅品牌都玩得一餐；所以今日煮飯版亦緊貼潮流，一於新舊共冶一爐，搵咗有60幾年歷史嘅地道飲品──維他奶，Crossover新派甜品，實行用唔同味道嘅維他奶溝出各款Dessert；而為我哋示範嘅師傅，正係最近越開越多分店嘅發記甜品店老闆。一於趁周末，做幾款一家大細都啱食嘅有益甜品啦！
記者：趙珮倩
攝影：譚盈傑
示範：發記甜品老闆KingWong
（雅蘭中心分店電話：23966928）
意大利芒果三色飯
需時：40分鐘
價錢：$20/2人
材料：芒果1/2片切碎、菠蘿2片切碎、意大利飯50克、砂糖2茶匙、原味維他奶500毫升、無鹽牛油10克、薄荷葉適量
做法：先將意大利飯汆水5分鐘，然後放進平底鑊，加入維他奶和1茶匙砂糖，不停攪拌煮至收亁水，盛起備用；菠蘿放白鑊炒至亁身，加入牛油和1茶匙砂糖拌勻煮溶；將菠蘿鋪底，放上意大利飯，面層鋪上芒果，最後放上薄荷葉點綴即成。
貼士：意大利飯要用力壓實，否則好易散晒；相反，芒果就唔可以太用力壓，否則會出水。
老闆心得：「呢個甜品靈感來自法國菜，試過用麥精維他奶，味道好怪，都係原味最夾，或者用鮮奶代替都OK，味道會比較清！」
香芋維他奶法式布甸
需時：40分鐘
價錢：$10/1人
材料：方包1片、芋頭1/3個、香芋維他奶550毫升、雞蛋1隻、無鹽牛油1小片、砂糖3茶匙、糖霜適量
做法：芋頭切粒，留起1粒，其他煮熟瀝亁，倒入375毫升香芋維他奶煲成茸，待完全冷凍後放攪拌機打滑成「香芋漿」，備用。雞蛋拂勻，倒入175毫升香芋維他奶及砂糖拌勻，用篩隔渣倒出「香芋汁」備用。然後將方包肉鋪杯底，放上1粒芋頭粒/牛油，加入1茶匙香芋漿，再放上方包皮，倒入香芋汁至9成滿，輕壓方包皮讓它吸收汁液，之後倒入香芋汁至全滿。焗爐以250℃火預熱，焗大約15分鐘至方包微微燒焦，取出灑上糖霜即可。
老闆心得：「倒些少水喺焗爐盤內，布甸就不會太亁身。另外要注意，香芋茸放入攪拌機前一定要完全凍晒，否則攪拌機一郁產生熱力就會爆。」
綠茶糖不甩
需時：25分鐘
價錢：$10/1人
材料：糯米粉45克、綠茶粉9克、維他奶Mocha100毫升、朱古力適量、鷹粟粉1/2茶匙、砂糖1茶匙
做法：先將糯米粉/綠茶粉加入暖水50毫升，搓成粉糰，分成大小相若的小粉糰，壓至2至3mm厚粉皮，包入朱古力，放滾水煮10分鐘成「糖不甩」。維他奶Mocha煮熱，加入鷹粟粉/砂糖，煮大約5分鐘，成「Mocha醬」，吃時將糖不甩蘸上Mocha醬即可。
老闆心得：「用Mocha煮醬蘸糖不甩食，可以加重糖不甩味道；不過包糖不甩時，要將朱古力放置正中，否則糯米皮好易會爆。」
鮮海底椰蓮子薏米露
需時：30分鐘
價錢：$10/1人
材料：原味維他奶375毫升、鮮海底椰1個、蓮子8粒、薏米1両、淡忌廉3茶匙、鷹粟粉少許、砂糖1茶匙
做法：先將海底椰切片蒸15分鐘，備用。維他奶煲滾，放入薏米/蓮子/海底椰，煮大約10分鐘至入味，然後加入砂糖/鷹粟粉埋芡，熄火後加入淡忌廉拌勻。
老闆心得：「記得熄咗火先落忌廉，否則會令香味流失。」
維他奶的誕生
維他奶誕生於1940年，由羅桂祥博士創立。由於正值戰後，普羅大眾生活貧困，營養不良，羅博士想出以相宜價格，生產一種營養豐富的奶類飲品──維他奶。初期業務進展得非常緩慢，售貨員以單車逐戶派送，而且需即日飲用以防變壞，每日約只售1,000樽。
直至1975年，維他奶率先引入保鮮飲品包裝技術，利用高溫將飲品消毒，自此其銷量急速增長。時至今日，維他奶集團已創製及推出近300款不同種類及包裝的產品，在全球30多個國家銷售。一個香港品牌做到跨越國際，香港人亦值得驕傲。
