前日意盃準決賽AC米蘭輸畀羅馬出局，戰果唔意外，賽後焦點係全場年紀最大嘅哥斯達古達、卡富齊失威，一個甩漏兼食塵，另一個就惱羞成怒踢跌文仙尼輸12碼。除咗AC雙「老」，羅馬「王子」托廸又射失12碼，幾個名將到底搞邊科㗎？
卡富怒鏟文仙尼
首先講40歲嘅哥斯達古達，佢係AC米蘭喺意盃嘅後防主力，但基本上無場好波，失嘅波仲要鑊鑊新鮮鑊鑊甘。好似呢場開波無耐就回傳拖泥帶水，造就文仙尼先拔頭籌；輸第2球，就因為佢老人家走遲半步布越位失敗，想追番敵將又追唔切。踢完上半場，呢個一代鐵衞就被調離場。
36歲嘅卡富都唔好得幾多，成場俾巴西同胞兼師弟文仙尼爆贏幾次，對方放完一段又一段；換轉係你都㷫，終於喺禁區一腳鏟跌對方，輸12碼兼輸風度。
講番卡富輸嗰球12碼，托廸嘅勁射被廸達擋出。過去「王子」射12碼十拿九穩，今季竟然已經5次宴客，賽後又有好多人講緊「王子」應該退位讓賢，不如交畀廸羅斯或者大衞比沙路操刀好過啦。
「人哋話家有一老，如有一寶，但踢波都唔使吓吓靠食『老』本啩？順帶一提，恩沙基完場前傷出，唔知會唔會益咗『大哨』呢？」