近排個市雖然大幅波動，有貨喺手嘅股民隨時損手爛腳，但仍然有唔少人心癢癢想入市，投資新手004022喺《Uwants討論區》度留言，問大家點樣決定買邊隻股票？佢話靠份糧好難令自己手頭鬆動，所以想搞搞新意思投資股票，唔奢望賺好多或日日有錢袋，只要間中賺到幫補吓都好，𠵱家睇吓報紙同雜誌，然後再學人分析。
小注短炒必揀輪
網友Yasi劈頭就問004022，究竟想用乜嘢投資略策？長揸抑或短炒？如果係短炒同資金少，梗係炒輪，利用槓桿效應以小博大，但買賣前都要睇吓書，參加吓啲免費講座，特別係輪商搵靚女搞嗰啲，但千祈唔好盲目跟從，俾靚女迷吓迷吓就買咗，想知多啲關於窩輪嘅資料，可以上去港交所（388）個網睇吓。
嗦螺絲亦提議佢先買啲投資書嚟睇，再用兩三個月一路睇書、一路睇住個市嘅走勢，開始時由於資金唔係咁多，只能買兩三注，所以要睇準先至入市，不妨再計吓所買股票嘅財務比率同睇吓圖表。
網友CIACID好大方咁分享咗自己嘅4種揀股心得：第一，睇吓網上嘅財經討論區，近排網友及板主講緊乜嘢熱門股票；第二，買啲容易記嘅股票冧巴，好似越秀投資（123）及中國海外（688）；第三，憑感覺，可能係靠第六感啩。唔知女人嘅感覺會唔會特別強呢？第四，睇報紙，睇吓股評人及分析員推介啲乜嘢股票。至於信唔信得過，就要大家小心諗吓喇！
易記冧巴未必好
其實，容易記嘅股票，都未必適合股票初哥玩嘅，因為好多時佢哋都係啲三、四線股，股價嘅上下波幅會好大，散戶考慮買入前最好諗清諗楚先，好似匯富金融（188）、成功控股（288）、國中控股（202）同奧瑪仕（959）等；當然，一啲好意頭又易記嘅藍籌股都未必好嘅，淨係睇吓8號仔電盈已經傷盡唔少股民嘅心，所以買股之前點都要做多啲功課。