鄭明訓辭去領匯（823）主席一職消息公布後，市場估計領匯將引入新管理層，有助提升公司嘅盈利能力，股價當日就曾觸及歷史高位18.5元。喺《香港討論區》及《Uwants討論區》，唔少網友認為鄭明訓辭職會有利領匯業務發展，但租戶就可能要面對大幅加租嘅壓力，網友建議租戶效法大家樂（341），買領匯股票作對沖。
網友firstofmay06話：「領匯換主席，相信TCI（兒童基金）同德銀好快就會原形畢露，大幅加租，為股東謀取最大利益。」kyho819亦指：「領匯想改革，學人搞名牌，引入連鎖店，屋邨商場已經唔係為屋邨居民服務，相信加租都冇得避免。」shamanking64稱：「小商戶就慘，建議佢哋買番領匯嘅股票嚟做對沖，就可以冇事囉。」
迫政府高價回購
另有不少人以陰謀論踢爆基金嘅詭計，700Galant笑言：「人哋梗係想加租加到小商戶做唔落去，然後租戶同居民去政府抗議，再逼政府高價買番晒，咁基金咪有得賺囉。」
其他網友亦同意，對沖基金點會咁好死，咁有心機去改善領匯管理，提升商場設備、資產質素。TCI入領匯會做長線投資咩？一下子加幾成租，股價飛升，散戶接貨，基金咪高位走佬。alexero就話：「TCI將領匯搞到五癆七傷，民怨沸騰，佢都無損失，因為到時實會有人炒回購概念，到時傾唔掂，咪一次過高位散貨囉。」
姑勿論陰謀論是否成真，但領匯股價已經反映緊股民期望，噚日收18.38元，再升0.36元或1.66%；3日升咗5.4%。