許冠傑（Sam）今年4月開嘅個唱，原本搵咗耀榮主辦，但耀榮老闆張耀榮話阿Sam唔肯做宣傳，所以唔會幫佢搞演唱會，但阿Sam個唱監製高志森前日又澄清話因為某啲原因，一早通知張耀榮唔會同佢合作做4月開嘅個唱，根本同宣傳無關。
證阿Sam個唱必開
𠵱家各說各話，外間人都唔知信邊個，噚日馮仁昭深入了解過，知道阿Sam係因為張耀榮呢輪官司好多，所以要開騷前擺1,000萬保證金喺律師樓，而每場演唱會要畀160萬阿Sam包埋做製作，符合晒呢啲條件先答應做騷，咁張耀榮覺得條件太辣，所以咪開唔成。
噚日馮仁昭打畀張耀榮，佢話：「阿Sam要我畀成千萬出嚟，我係覺得唔公平，而佢畀我嘅合約，我又未到手，所以好難作評論，如果佢真係話唔做，咁咪算囉！」至於高志森噚日就話阿Sam個演唱會一定會舉行，遲啲會公布詳情。