左丁山小時候最崇拜體育明星，好似巴西球王比利，香港第一個去英國踢波嘅張子岱等等，但最令人難忘嘅當然係亞洲鐵人，十項全能世界紀錄保持人（一九六三）楊傳廣。記得一九六○羅馬奧運之時，《香港時報》每日以大篇幅報道楊傳廣與同學（UCLA）強生（RaferJohnson）力拼，爭奪十項全能金牌，可講得扣人心弦，老竇每早叫左丁山落街買《香港時報》，由亞皆老街行到彌敦道再掃到去荔枝角道，居然買唔到一張，個個報販都話《時報》賣晒；急到滿頭大汗之餘，走去上海街，行返到文明里，先至搶到一份《時報》。後來楊傳廣卒之以五十八分之微，只係得到銀牌，令人遺憾，但楊傳廣為「東亞病夫」第一次在世界舞台爭光，左丁山老竇甚為激動，希望佢在東京奧運（一九六四）爭到金牌。但係到咗六四年，楊傳廣已經三十一歲，對十項全能運動員而言，黃金時代已過，加上政治壓力大，華人世界寄以厚望，台灣最失敗一招就係送埋佢父母到東京，以為可以刺激士氣，反而令佢患得患失，臨場又話患上感冒（事後有大陸落毒陰謀論出現），結果只得第五，正是希望越高，失望越大，左丁山曾為此流淚。
楊傳廣後無來者，以今日中國大陸體育運動員之多，仍然冇法子出產一位十項全能金牌高手，可以在世運、世界錦標賽爭雄，實屬異數。前一排遇上中學體育老師，佢曾經參加東京亞運（一九五八），見過楊傳廣，以佢嘅記憶，楊當年曾有讓分畀同學嘅壓力，到咗六○年，楊以些少分數落敗畀強生，此說亦有人信。余生也晚，唔知咁多事，只係想從好嘅一面睇兩位UCLA同學在運動場上君子之爭。五十年代嘅台灣係「克難時期」，窮到燶，送窮家山胞楊傳廣到UCLA，需要唔少美金，國民黨政府可以話傾全力支持。體育老師話人窮俾人蝦，國窮亦然。「中華民國」亞運籃球隊在決賽周贏菲律賓，輸畀日本，菲律賓贏日本，以得失分計，「中華民國」可得金牌，但主辦當局判菲律賓得金，日本得銀，「中華民國」得銅牌，老師話隊長唐雪舫流着眼淚，不願領獎。