香港人鍾意一家大細周末去睇樓當娛樂，好多人明明只係想睇吓，但經唔起經紀嘅軟硬兼施同疲勞轟炸，無端端行個圈就買咗層樓返嚟。
原來經紀除咗勁吹個盤嘅好處，捉睇樓者嘅虛榮心之外，仲有一招就係唔理三七二十一，碌咗個客張卡或者收咗張票做訂金先，然後至慢慢磨佢。好似網友mimosa就係《親子王國》討論區問：「啲地產（經紀）見到你有啲意思，係咁叫你畀票佢……點解？」
魚生即刻感同身受咁話：「我又係，仲未講啱價錢，個地產（經紀）就係咁催我，要我落訂！我話個價唔啱，再講吓𠻹！佢問：『係咪講低咗個價就落訂？』我話你講得低先算！拖住佢先。」
Teresa都話：「可以唔使理佢。畀票佢係顯示你有誠意買，等佢有啲揸拿同業主去bargain（講價）。不過咁，有啲地產（經紀）嘅操守有問題。真係好危險，睇吓你點睇啦。如果你有意思買，你出嘅價又係市價（以田土廳成交為準，唔好理叫價），你都可以直接話畀個經紀知，票你唔會畀佢過手，不過如果業主肯接受你個價，你會即刻開票。」
唔入錢等彈票
其實，無論你睇樓嗰一刻係咪有興趣，都千祈要保持冷靜同唔好耳仔軟，畀經紀幫你碌咗卡或者開票，否則，佢哋一定會死𦧲爛𦧲，令你做錯決定。如果你真係一個唔好彩，一時失魂落咗訂，可以唔入錢落個支票戶口，等彈票，最多都係畀銀行罰一百幾十，好過買錯層樓。至於碌咗卡，除非個經紀肯幫你截番條數，如果唔係，自己係唔可以要求卡公司唔過數。不過，最重要係，無論有冇開票或者碌卡，千祈唔好盲摸摸咁簽任何合約，否則隨時一身蟻。