上個禮拜六，我哋《蘋果日報》喺灣仔會展舉辦咗投資講座，孫柏文有幸作處女表演。當時，我呼籲大家參加「白銀戰隊」，一齊「一注獨贏買白銀」。理由係當不久嘅將來，市場對美元購買力失去信心時，白銀可令大家避開通脹嘅一劫。
當日我亦講過，最能代表美帝嘅美元，喺千禧年代面對嘅壓力同挑戰，同上世紀70年代非常相似。首先，70年代有嚴重經濟衰退，千禧就有「世紀樓市泡沫爆破」，結果令中央銀行瘋狂印發鈔票，令貨幣供應有如滔滔江水、綿綿不絕。
跟住再有美帝軍力備受質疑，70年代中有美軍戰敗撤出越南，再有美帝喺中東嘅最大盟友，伊朗國王ShahofIran流亡海外，換來一個對美恨之入骨嘅執政團體，最後仲有蘇聯以好似好輕鬆嘅姿態，「步入」阿富汗。千禧年代就有美軍不能擺平伊拉克，或者收復阿富汗嘅叛軍。
大家可能會問：「一個國家嘅軍力，同佢保護貨幣購買力嘅能力，有乜關係？」問得好！其實，一個國家嘅紙幣只不過是一張欠單，手上嘅紙幣最重要變換成有用嘅嘢。例如，港元同美元掛鈎，港紙就係一張「隨時可以還美元」嘅欠單。以前，即係1971年之前，美元同黃金掛鈎，美元就係張「隨時可以攞黃金」嘅欠單。今時今日，美元已經完全自由浮動，大家繼續持有美元，都只因覺得攞美元可以換到其他嘢。
就算有一日，花旗國乜嘢都冇得畀你，大家最終都相信美帝會派遣軍隊去世界任何有資源嘅地方，美軍會有能力去搶啲嘢番嚟，去實現美元嘅購買力。呢個「軍隊搶嘢番嚟去兌現紙幣」嘅「終極保證」，自古至今，不論係羅馬或蒙古帝國，都係紙幣令人揸得安樂嘅原因。其實，花旗國曾經喺03年嘗試過體現呢個「終極保證」。當時花旗國揮軍攻擊伊拉克，如果可以成功大幅提高石油產量，令油價大跌，就變相令美元購買力大幅增強。所以，市場對一個國家嘅軍力睇得咁重。
全球人類集體懺悔
講座當日，解釋完美元面對嘅壓力之後，有個觀眾問問題嘅環節，不過因為時間有限，好多問題都未能解答。所以今日想為大家答其中一條未能解答嘅問題。有觀眾問：「點解去到80年代，黃金、白銀最終都從高處跌落嚟？」
原因其實很簡單，首先有列根總統上台，令全世界對美帝霸主地位重拾信心。不過最緊要係，當全球經濟已經變成依賴濫發鈔票過日嘅癮君子之時，突然出現一個「貨幣神父」叫PaulVolcker嘅做聯儲局局長。佢堅毅不屈嘅福音戒毒手法，將新嘅貨幣供應停止，將濫發嘅鈔票攞走，手段包括將聯邦基金息率喺80至81年之間，三度提升至20%。全球經濟面對20%息率，就有如全球人類進行集體懺悔。今日，為大家提供咗一幅走勢圖，論盡79至82年之間息率同金價嘅關係。
黃金、白銀係神賦予世人嘅貨幣，凡人如果覺得自己有能力創造另類可以經得起歷史考驗嘅紙幣，就一定要間唔中進行80年代初嘅嗰種集體懺悔。不過所有驚黃金、白銀會跌嘅朋友，我有兩個問題問你。第一，如果現任牛仔總統係Nixon，下任總統會係卡特或列根？第二，你估幾時先至再見到聯儲局喺兩年之內三度將息率提升至20%？所以黃金、白銀仲有排升，大家要「一注獨贏買白銀」！
金手指網誌：
http://phatdat.blogspot.com