一早已經同大家提過我係一個巴士迷，所以每次上親網都會睇吓嗰啲巴士討論區，順便八吓有咩新料嘛；不過，早兩日瀏覽一個叫「HKiTALK.Net」嘅網站嗰陣，就發現到網友iczer3發出了一條叫《中巴再現－ML1》嘅文章，初時以為恰巧當地有巴士公司同樣叫中巴，殊不知題目所講嘅中巴ML1，原來真係當年曾在香港服役嘅MCWSuperMetrobus！呢部車其實早已售往澳洲，後來卻輾轉售予現任車主手上，佢仲刻意將部車回復當年喺中巴服役時嘅樣貌，連路線號碼及目的地顯示牌，都係同以前一樣，問你服未！
其實香港有好多有心人，都會Keep起一啲曾為廣大市民服務嘅巴士作收藏之用，最好例子就係我去年曾訪問過嘅Gary，佢同一班朋友Keep起咗幾部富紀念價值嘅巴士，讓市民大眾能喺某些場合，緬懷一下佢哋服役時嘅雄姿；可是，若叫政府建立博物館，去保留呢啲曾為市民大眾服務嘅公共交通工具，恐怕難過登天，大家睇吓嗰幾部被廢置於茶果嶺嘅火車車廂，便可知得一清二楚！
記者：鄭達基
有關討論網址： http://www.hkitalk.net/HKiTalk2/viewthread.php?tid=181096&extra=page%3D1