近年篤信基督教嘅女藝人梁藝齡（前名梁佩玲），去年12月5號喺澳洲拍攝福音節目《地球深度行》時發生車禍，當時佢被拋出車外，多條肋骨折斷，顎骨移位，腮骨爆裂，肝臟撕裂。意外後，梁藝齡被送往當地醫院接受一連串手術。雖然傷勢嚴重，但留院一個禮拜之後就可以出院，難怪梁藝齡用神迹嚟形容今次嘅事件。
險腦部缺氧
康復得七七八八嘅梁藝齡噚日喺尖沙嘴青年會召開記者會，只見佢塊面仍有少少腫，額頭同腮邊貼咗退疤貼。梁藝齡話今次發生車禍完全冇驚過，更加冇流過一滴眼淚，但因為顎骨移位，所以醫生喺佢顎骨左邊鑽咗兩個細窿，鑲入金屬支架固定傷口，等顎骨調整至正常位置後，就可以攞番個金屬支架出嚟，如果兩個月都未能康復，咁就可能要再開刀。
舉行見證會
記者會上，梁藝齡憶述事發經過，佢話車禍前喺車上小睡，到發生意外嗰一刻佢即刻醒咗，不過好快就失去知覺，腦海裏面只有零碎嘅片段。梁藝齡嘅主診醫生話好彩醫護人員及時為佢提供足夠氧氣，否則出現腦部缺氧，隨時會影響佢嘅智商。
今次影音使團為梁藝齡拍咗套紀錄片，叫做《極速震撼》，搵埋醫生、科學專家講解論證，證明梁藝齡今次走過死亡邊緣係神迹，佢仲會喺下月25號舉行見證會，同更多人分享呢個畢生難忘嘅經歷。
