記得第一隻超合金嘅六神合體唔係用錢買嘅，而係小學嗰陣用默書成績同阿媽交換。開頭話3次連續一百分，結果3次又3次、3次又3次……12次至換到……1隻。大個咗之後買番，就算花上千金，都要買番隻，買番過去嘅回憶……
記者：梁學文
攝影：林栢鈞、梁學文
愛超時空要塞
一講起玩具，好多男人總會數數「威水史」。好似商台903DJDonald，一提起玩具收藏品，仲自稱玩具癡漢：「我真係好愛玩具，之前買咗個25格嘅直身櫃，早就逼爆咗，啲玩具一路蔓延開去，有好多都不見天日。」幾百隻玩具入面，大部份都係同軍事有關，最愛係超時空要塞的VF-1J戰機，其次就係StarWars白兵。
俾老竇呃
Donald儲玩具嘅歷史要由小學開始，超時空要塞嘅VF-1J戰機可以話係佢第1號珍藏，Donald話：「我細個買過1隻VF-1J戰機，因為唔使砌又可以變身。可惜上次搬屋嗰陣唔見咗，結果用咗2千幾蚊買番。」千金難買心頭好，「2千金」濕濕碎啦！講到細個玩玩具，Donald就有件事好深刻，就係俾老竇呃：「好記得讀幼稚園嗰陣要記A至Z，我老竇就話如果我背得到就送1隻玩具畀我。我好努力去記，終於都背得到，到我收到份禮物嗰陣，一打開，點知係老竇飲完人頭馬個酒蓋（聲音突然扯高8度），我呢一世都唔會忘記。仲有我記得小學嗰陣同阿媽講車費貴咗，要$300。阿媽畀咗錢我，我就收埋啲錢買玩具，最後買咗隻黃金俠！」Donald叫小朋友千祈咪學，講大話係唔啱嘅。
最想做幪面超人
儲玩具係一個回憶，最重要係可以搵番舊時嘅感覺回味吓，Donald就覺得自己似魔盜王，一班冇着水手裝嘅大細路去尋寶，之不過尋嘅係細個嗰種回憶：「我細個嗰陣見到幪面超人就好想扮，大個咗依然有呢種諗法，好似幾年前去日本，就同幾個Friend去買玩具，俾我搵到條超人皮帶，第一時間入貨。最好笑係我怕俾Friend笑，結果用衫包住放入篋，真係好好笑！」
玩具係用嚟玩
Cafe老闆Vincent儲咗玩具20幾年，最愛係超合金，對玩具有另一種睇法：「好多人儲玩具只係用嚟擺，當擺設係好，不過就抹煞咗玩具本身嘅意義。我覺得玩具的最大意義係被人玩，唔係買嚟做咩呢？」憑住呢種態度，Vincent就喺銅鑼灣新會道開咗間樓上Cafe叫SmallPotato，「我知啲原版超合金好貴，但係玩具應該帶畀人開心嘅回憶，而唔係擺同炒，我開Cafe都係想公諸同好，令其他人可以搵到快樂。」真係好多謝Vincent，如果唔係佢，我都冇機會摸到原版黃金戰士同金毛獅王超合金，呢刻好似返咗去小學時代。
新不如舊
雖然結咗婚有個女，Vincent依然好鍾意買玩具，平時日日上網Check價：「我日日都上網，睇吓邊隻平咗可入貨。我最心儀係原版超合金，不過新嘅超合金魂我都會儲，因為實在太靚，每個Detail位做得好細緻，又可以擺到唔同嘅Pose！不過新版始終唔及舊版，復刻版玩上手始終都唔係嗰回事，嗰種感覺確實唔係復刻版可以取代得到。」
上網Bid貨要眼明手快
「我好多隻Barbie都係Bid返嚟，因為喺香港實在太少太難搵喇，款式唔夠網上多。雖然要畀運費，但係好多款都可以搵得到。」摸住手上Bid返嚟嘅Barbie，Bonnie就好興奮咁話：「上網Bid嘢最煩就係會被人係臨尾幾分鐘以1毫子之差Bid贏，如果要Bid就要睇準時間，如果俾人捷足先登會勁唔開心。」如果要上網買Barbie，Bonnie建議喺淡季（少節日嘅日子）會抵買啲，因為越近節日，價錢越高。
慳埋夠畀層樓首期
Bonnie專攻Barbie特別版，儲咗5年，數數手指，買Barbie嘅錢差唔多可以畀買樓首期：「其實都幾奢侈，如果慳埋唔買儲起，𠵱家應該可以夠錢畀首期。曾經諗過唔買咁多，亦都試賣過，不過真係好唔捨得！」
經典玩具排行榜
喺街頭做個簡單調查，問吓邊款玩具至係佢哋嘅至愛。原本諗住鐵皮玩具會入十大，點知原來都係日版卡通人物係最受歡迎。雖然超合金公仔好吸引，但係長青嘅幪面超人先至係大家嘅最愛。
No.1幪面超人
日本嘅幪面超人喺好多人心目中地位勁過內褲外穿嘅Superman。
No.2鐵人28、鐵甲萬能俠
兩隻大鐵人同樣排第2位，唔講唔知原來第1隻超合金機械人係鐵甲萬能俠。
No.3聖鬥士星矢
長出長有，可能因為最近再出神話系列，令佢長期成為人人嘅至愛。
No.4扭計骰
見到色彩繽紛的格仔，就會想起扭計骰。
No.5高達
要入榜又點可以缺少高達？不過近排聲勢無以前咁勁了！
No.6搖搖
搖搖好多人細個都有玩過，係咁Fing來Fing去，其中可樂嘅出品更係令人瘋狂。
No.7變形金剛
變形金剛可以入十大，應該同今年會上大銀幕有關係。
No.8叮噹
大受歡迎嘅機械貓仔，周邊玩具產品多到嘔。
No.9小雲
歌仔都有唱：「小雲同小吉好重要！」入十大實有份啦!
No.10Q太郎
樣子夠Cute，人人都識佢，難怪可以打敗鐵皮玩具入十大。
街坊各有至愛
