自93年9月起，接替簡達恒出任金管局副總裁嘅韋柏康，今年8月底約滿後就會離任，一向作風隨和、兼帶有花旗國老外黑色幽默風格嘅韋翁，噚日主持完07年度銀行業回顧與展望後，繼續同傳媒雞啄唔斷，依依不捨，仲真情流露咁話，呢次睇怕係任內最後一次主持嘅記者會，又賣大包講咗唔少個人對本港銀行業前景嘅睇法。
眾人都好關心Ryback離任後去向，佢好直接咁話，並非如傳聞所指，會加盟銀行公會做全職CEO，又好坦率咁講，呢個位由唐人出任較適合。至於留港發展定係全身退休，佢都未決定，但呢一刻，佢好肯定約滿後會先返美國，事關佢個寶貝女10月要披嫁衣，韋柏康呢個外父梗係要主持大局。
至於副總裁個位，應該由本地華人定係洋人繼任，佢話唔到佢話事，但指住身後一眾助理總裁（阮國恒、唐培新同埋李令翔），話個個都咁標青，相信處理金管局事務絕無問題。
[email protected]