華仁仔最近喺政壇紅透半邊天，港華曾蔭權係三月二十五日小圈子選舉嘅大熱門，當選賠率，如果由左丁山開攤嘅話，只有一點二倍；另一位候選人係九華梁家傑，夠膽出戰，勇氣可嘉，賠率係五百倍。如果賭讓球嘅話，當奴曾可讓五百票，勝出賠率可提升至一倍半，即係話當奴得票要比阿倫多五百零一票，先至叫做贏。
熱成咁，冇趣味啫，睇跑馬好玩好多。上星期日跑馬，捧皇仁仔馬主就有錢贏啦，大家見到最有錢、皇仁校友何鴻燊與四姨太在沙圈出現，立即買第七場「爆炸」，第八場「爆冷」嘅位置，一百蚊位置過關收番五百四十幾，回報率好過買2628中人壽。到咗第九場，皇仁校友團體屬下嘅「皇仁飛駒」喺入閘前五分鐘，票如雨下，獨贏賠率由九點六倍跌到五點六倍，估計有成七八十萬元擲落去。「皇仁飛駒」班校友馬主多數係專業人士，包括滙豐一姐梁太嘅梁先生在內，佢哋邊度會視錢財如糞土，係咁落飛吖？呢一大舊賭注究竟來自何方神聖，要問句天！前一個星期有一隻馬出現同樣情況，隻馬後來輸咗，左丁山問練馬師：「馬主冇賭錢，係唔係你落飛？」練馬師笑曰：「我有八十萬就拎去做定期啦，邊會賭晒落隻馬度咁笨實。」
結果票到馬到，「皇仁飛駒」竟然識跑二千米，終點前壓贏同馬房嘅「卓越歡騰」，形成馬房Q，練馬師李易達係皇仁仔，當然冇計，點知馬會賽事董事主動研訊，判「卓越歡騰」受阻，升為冠軍，「皇仁飛駒」被貶為第二，並且嚴厲譴責「卓越歡騰」騎師巫斯義不代馬主及練馬師提出抗議。「卓越歡騰」馬主之一劉錫康（靚蝦王馬主）自然高興，但成班皇仁仔就紮紮跳，據左丁山聽到，佢哋非常不滿，覺得有寃無路訴，平白唔見咗幾十萬銀頭馬獎金，而且影響「皇仁飛駒」參加打吡賽嘅希望。不過可能最紮紮跳嘅就係大注落飛賭「皇仁飛駒」嗰班人，幾百萬獨贏彩金已經入咗袋，俾馬會賽事董事攞番出嚟，輸到彈起也。