蔡國權妻含淚轟社署

蔡國權妻含淚轟社署

蔡國權02年在東莞發生嚴重車禍後患上腦萎縮,導致行動不便及說話困難,月前被擔任監護人的社署安排入住老人院;蔡太稱社署在蔡國權入住老人院後已停止為他安排物理治療,蔡太多次向社署提出要求也不獲理會,遂於日前向傳媒哭訴,她表示丈夫在缺乏物理治療下,行動差了許多,生怕丈夫因此加速退化,情況令人擔憂。

蔡國權太太余達卿,上周五晚(26日)在好友及家人陪同下,於尖沙嘴一卡拉OK約見傳媒,但事先講明不欲傳媒拍照。對於月前蔡國權被社署安排入住慈雲山一所老人院,蔡太邊飲泣邊說:「舊年八月,我哋個工人剛好約滿返鄉下放假,跟住社署喺呢個時候話要帶佢離開,但治療停晒。佢(蔡國權)嘅朋友都覺得停咗唔得,仲搵人去幫手,但係社署堅持要帶人走。我只係資產監管人,當日走係好愕然,佢哋帶咗兩個差人上嚟帶蔡生走,都唔肯等我返屋企先帶走。」
問到蔡國權現時健康情況,蔡太大感無奈說:「佢(蔡國權)冇以前咁好,行動差咗好多,以前都可以行到,𠵱家企都唔想企,腳冇力,因為治療已經停咗。我只係想佢有得做物埋治療,唔想佢咁快退化,幫吓佢做到運動,但佢哋(社署)話蔡生唔需要,佢哋話係醫生講唔需要!我希望佢可以去到麥理浩復康院,因為每日都有專人幫手做治療。」

求助精神科醫生

蔡太續說:「官字兩個口,唔係家人想做乜就可以做到,我好明白朱振國家人心情。𠵱家唔係因為老人院環境問題,最重要係安排物理治療畀佢。做物理治療要好多儀器,又要物理治療師。我哋普通人教唔到佢最正確嘅方法,一定要有專門嘅人做!」
對於早前有報道指蔡國權父親曾向人狂呻蔡太鮮有到老人院探望丈夫,蔡太未有正面回應,只說:「有苦自己知,我一直有照顧佢(蔡國權),又會盡量配合社署,但爭取好多嘢都爭取唔到,我都要生活,我都冇人養,仲要工作。」其時蔡太身旁的妹夫表示蔡太多年來受到的打擊實在太大,又要與社署角力,已在看精神科醫生。

社署聽醫生意見

社署發言人昨就蔡太投訴回覆本報說:「社署社工一直為蔡先生安排由主診醫生指示所需的治療,對於家人提出的其他要求,社工會在考慮醫生及物理治療師的意見及實際可行性後,為蔡先生作出決定及安排。由於社署現時為蔡國權先生的監護人,為保障蔡先生的個人私隱,社署不會透露個案詳情,但社署強調,社工一直並會繼續密切跟進個案,並會以受監管人士的利益及福祉為大前提,為當事人制訂福利計劃。」
採訪:王連連

蔡國權月前被社署安排入住慈雲山一所老人院,坐在輪椅上的他拿起扶助繩鍛煉手力。
《壹本便利》圖片

許冠英和徐小鳳(左一及二)去年為蔡國權舉行慈善演唱會,為他籌募醫藥費。
資料圖片