潮流興講環保，用膠袋會俾人指為落伍，追唔上時代，改用環保袋至啱，沙田陳太因此買吓買吓，買咗成半打環保袋，去街市或超市用，點知後來俾人指點：「你用啲環保袋唔係真布嚟嘅，一啲都唔環保。」陳太一個師奶，點識得咁多呀，想話買啲「真布袋」，點知撞到屋邨內一位大學講師，講師同佢講：「買布袋，有講究，最好用一啲有機棉花而且係公平貿易（fairtrade）織造嘅環保布做成嘅環保袋。」陳太聽到一頭煙，原來買個環保布袋都鬼咁麻煩，心諗不如用紙袋啦。用紙﹖想死乎，唔少不知名團體（即係唔知由邊度走出嚟嘅團體）無事不批評，每年都會趁大節日指市民用禮物紙，包裝紙浪費，大學中學用紙印刷宣傳品浪費，睇怕佢哋就嚟會批評書本印刷，報紙印刷浪費，鈔票用紙浪費，世界最好成為無紙世界，先至可以保存樹林。故此用紙袋喎，好唔環保喎。
沙田陳太呢日路經中環佐丹奴買樽頸T恤，覺得質地唔錯，價錢特廉，抵到爛，於是買咗兩件。原來佐丹奴已經唔用膠袋，改用「再循環紙袋」，店員用一個紙袋裝住兩件T恤，交畀陳太，點知一轉手，紙袋已經裂開，店員似乎已睇慣，將紙袋向後一丟，立即換過一個，陳太稍為大力一拎，紙袋又爛，店員畀多一個紙袋，一個套一個，裝住兩件T恤。陳太未行到戲院里地鐵站啫，紙袋已經裂開。陳太好驚成個袋喺地鐵車廂內逼吓逼吓，會成個爛晒，於是雙手捧住，行落地鐵，十分狼狽。
陳太話：「乜佐丹奴啲紙袋咁易爛㗎，咁樣叫做環保？佐丹奴想慳番啲成本啫啩，唔該佢以後用番膠袋好過。」原來再循環紙啲質地甚曳，輕輕搣吓，已經可以分裂，如果貨物稍有重量，穿底話咁易。諗深一層，好多人，好多公司搭環保順風車，假環保之名，節省成本，可以賺多啲。陳太着件佐丹奴樽頸T恤，遇到講師，講師讚：「幾靚喎，係唔係用有機公平交易棉做㗎？」陳太冇咁好氣，叫講師去問佐丹奴。