做生意最講信用，準時交收唔賒數，之不過喺60年代，金融信託服務唔係咁發達，搞出口業務同心口掛個「勇」字冇乜分別，加上港英政府奉行嘅「積極不干預」政策，商人隨時渣都冇得剩。當時，利豐董事總經理馮國綸嘅老竇馮漢柱，就搵班有心商家，勸掂政府成立香港出口信用保險局，辦理出口風險信託業務，時至40年後嘅今日，有關服務已經推展至企業融資等專業範疇。
信保局早前搵咗自由黨議員林健鋒、同埋東亞主席李國寶公子李民橋等人，編咗本《承傳四十年》特刊，噚日專登贈送首本書冊畀馮國綸，紀念佢尊翁嘅功勞。其實信保局嘅諮詢委員會歷來亦有唔少本港資深銀行家支持，例如第一屆委員會成員就有東亞嘅簡悅慶，恒生銀行前董事長利國偉。作為現時華資銀行家代表嘅李國寶，亦獲贈紀念書。
[email protected]