近年嘅一手樓成日俾人彈，但鬧還鬧，依然有大班捧場客。無他嘅，一手樓有嘅嘢，二手樓又未必畀到，其他唔講，一手樓有基本裝修，要求唔高嘅買家，訂做幾件家具就可以搬入去住，但買二手樓就唔同，好似網友fionbaby2002買二手樓，需要顧慮嘅嘢特別多。
fionbaby2002喺《親子王國》討論區上話︰「我睇中兩間屋，一間十分舊，如果要就全屋拆，包括地板，片甲不留，有排執，但價錢就可商議；另一間就好企理，有裝修，只需略為裝修即可入住，當然價錢就企硬。」佢話兩間屋價錢相差15萬左右，唔知點揀。
差15萬不如自己搞
網友mwh即時回應︰「相差15萬都好大喎！用15萬可以全屋大裝修啦。」cece0712亦認同︰「其實𠵱家裝修真係平咗，我朋友啱啱都裝修完，500幾呎單位，全屋大執都唔使12萬，唔使兩個月就搞掂晒啦！」
講開裝修，網友NOPAN就鬼咁勞氣，佢話屋企500呎都唔夠，裝修成4個月都未搞掂，原來佢唔好彩撞着間黑店，「我屋企咁細都無乜嘢搞到，只係想執好啲水電（都廿年樓齡）先裝修，執吓地同牆咁咋，點知俾人搞成咁，陰功。」
裝修投訴時有聽聞，業主唔想中招，就要聽消費者委員會忠告，如要做全屋裝修工程，雙方最好事先訂立合約，列明各項裝修收費及總額；裝修費亦不宜一次過付清，應該按工程進度，分3至4期攤付；圖則、尺寸、物料也要事前草擬清楚，避免爭拗；另外，業主最好不時到單位視察，了解施工進度，如果發現有問題，可即時與裝修公司商討。