將軍澳真係「鬼地方」！冇嘢食、每去一笪地方都要行你10幾分鐘，喺度做人真係要有耐性。
話說某日要入將軍澳交稿畀老編，順道走去調景嶺彩明苑食飯，有間落地玻璃食粵京川菜飯店幾出名，走入去試吓啦！筆者見天口凍凍哋，老點個臘腸排骨煲仔飯暖暖身，可能就收工關係，落單侍應馬上兇我：「要等好耐㗎喎！點第樣快啲喎！」等！又如何？煲仔飯係我去新店至愛，事關熱辣辣，正是衰極有個譜。
其間追單幾次，一直叫我等，等咗半個鐘真係頂唔順，叫經理埋嚟，先知原來漏單；火起！諗住走頭唔食，經理好把炮話：「5分鐘包你有得食，唔到乜都得！」心諗講就無敵呀！點知3分半鐘熱辣放到枱面，不過餸同飯完全冇溝通，一粒飯焦都搵唔到，真係火都嚟，擺明飯、餸放入煲內燒兩燒上枱，經理臨行仲暗寸一句：「成班朋友嚟，見你最早落單，但個個食完你先有飯食！」今時今日咁嘅服務態度，係喺呢類人迹罕至的地方先搵到，畀在旺區？一早關門大吉啦！