「雖然阿祖形象唔太健康，搵佢做藍本分分鐘會影響票房，但講到底，唔係最近呢名『壞孩子』重新上力，『士哥』頻頻，都唔會有人睇中佢！」
阿祖安奴定朗拿度大啲？你問求大俠都答你唔到，但巴西《環球體育》就連「大哨」轉會都唔理，以國際米蘭前鋒阿祖「拍戲」做咗頭條新聞！嗱，球迷唔好噓住，事關齣戲唔係阿祖做主角，只係參照佢童年生活，準備開拍嘅自傳式電影《Adriano,L′Imperatore》（阿祖安奴，國王）！
母慈子孝劇情催淚
求大俠為咗球迷，甘願冒俾律師告嘅風險，爆吓預告。呢齣戲係由阿祖出世開始，講佢點樣喺巴西里約熱內盧貧民區掙扎求存，最後走入五光十色嘅星光大道！戲內重要嘅部份係佢11歲時，父親中流彈昏迷兩個月，導致佢暫時放棄足球，離開法林明高青年軍，到大街上幫人擦鞋嘅情節！
無幾耐，阿祖嘅媽媽突然走到佢面前，眼有淚光咁講：「唔好再做喇，阿仔，咁樣會摧毀你一生㗎！」其實，阿祖初到意大利時，因為唔適應生活，影響咗佢場上表現，即使有說當時其母係唔想囝囝做「蒲精」，而專登由巴西飛去陪佢，但戲內就話其母係想佢生活安定啲先咁做。
劇本經過數度修改後，已到完成階段，可惜開拍日期仲未定；電影監製仲祝福阿祖，如果佢場上表現再好啲，到時一定會全球大賣喎！