點解有啲人搵錢好搏殺，但到退休時仲係冇乜錢？專家話，原因之一係理財不善。
關鍵在於點使錢
美國部份富婆話：「發達秘訣係平時慳家，將剩低嘅錢用作長線投資，賺取回報。」華爾街著名基金經理布萊特．麥克蒂格講過，一個人嘅富有程度，唔係視乎佢搵幾多錢，而係取決於佢點樣使錢。
網民TLoony喺《MSN討論區》問：「點樣先可以喺30年後成為百萬富翁？」
Phil5185教路：「你只需每月儲起333美元，放入一個每年增長約12%嘅基金，例如追蹤美股標普500指數嘅基金，30年後就有100萬美元。」過去30年，該指數每年平均回報（連同股息再投資）約12%，就算最差嘅一年亦有9.42%，好過存款證（CD）同高息定期存款。
PoleAx反駁：「過往表現唔等於將來表現，聽講標普500指數將來嘅回報好難高過8至10%，究竟係真唔係？」frrrpants勸佢唔好咁悲觀，因為專家話，過往嘅長期趨勢，係未來表現嘅最佳指引，所以將來亦應該會有約12%回報。
Phil5185亦提醒投資者：「有啲人自作聰明，經常轉換投資組合，跟風買入舊年表現理想嘅投資項目，希望跑贏大市；但結果每年只有3至5%嘅回報，所以投資者唔應該經常改變投資組合。」
美國「股神」畢菲特講過，長線投資係致富之道，好股不妨長揸。據悉，佢每隻股票都起碼持有8年或以上。