每個人買股都有自己嘅「程式」，冇話一定行得通抑或撞梗板，有散戶見早前天鷹電腦（1129）個價升得好靚，可惜想追已經太遲。
《中產部落MiddleClassBlog討論區》嘅會員teachmelose就立定心腸，星期一喺0.226元入咗創新能源（702），佢好坦白咁話：「買嘅原因係天鷹狂升，追入唔番，亂咗陣腳，亂買今日（星期一）十大升幅股，高追一日，博明天（星期二）升多次。」
創新能源繼星期一升咗16.4%後，星期二又升多15.9%，連續兩日榮登十大升幅股之一。
teachmelose前日已經喺0.25元放咗，賺咗一成多就離場；唔知係咪食過番尋味，臨近收市時，佢又喺0.4元入咗中盛糧油（1194）。此股亦係星期二嘅十大升幅股之一，升咗17.65%，聽佢講買嘅原因，似乎有點技術分析嘅功夫：「一年嘅圓底收集完成，突破幾日後並完成後抽，看來明天（星期三）要裂口高開向上了。」
同賭博冇分別
亨達集團研究部董事黃敏碩認為，如果只睇波幅買股，同賭博根本冇分別，要睇埋成交係咪配合先得，中盛糧油上個禮拜成交股數雖然見過1.5億股，但係其後已逐漸萎縮，星期二得番3000萬股成交，如果只係股價升但成交量配合唔到，散戶就要小心喇！
事實證明，中盛糧油噚日成交量跌剩2468萬股，收報0.36元，瀉足一成。