「無銀両又無門路，唔通鍾意老爺車就得個睇字，難以真正擁有？」曾有朋友這樣向我發老脾，我惟有好言相勸提議他買像真度高的模型頂住檔先，但佢又嫌人哋唔夠特別，度度有得賣，太濫！我惟有信口開河應酬佢，話幫佢搵啲特別貨色，好彩後尾都俾我搵到幾架老爺福士，架架都由人手用鐵皮打造，最重要係每款得一架，完全切合佢要夠「獨」嘅要求。
記者：黃婉冰
攝影：林栢鈞
生銹胎軨、車身，論VintageFeel，呢架開篷甲蟲仲有味，連軟篷都刻意油到啡啡黃，好有60年代甲蟲嗰種老爺味，連軚盤、錶板都有，幾精細！
儲開福士，咁就唔爭在買埋呢架福士MiniVan啦，車頂有晒滑浪板、睡袋等裝備，車身仲噴晒Cutie狗仔腳，都算係齊料之選！
成個車殼到車廂設備均由人手打製的經典甲蟲車，由顏色到車身線條、胎軨同真車一模一樣，Detail位做到足，離遠睇唔多覺係用鐵打造。
唔想齋睇無得用，可以諗諗呢個LocalDesign嘅紙巾套，由店主自己設計，將成盒紙巾套入去之後，紙巾由車頂掹出嚟，盞鬼又實用。
售賣點：AxleWorkshop（23325220）
地址：灣仔軒尼詩道302-308號集成中心UG25