近日有數字顯示，全港有超過900萬個手機用戶，即係平均每一名香港人擁有1.3部，位列全球之冠，確實厲害。另一件事，係政府考慮緊發放第五張3G牌照嘅問題，佢哋係講緊日韓地區嘅CDMA2000制式，而唔係大家一直用嗰隻WCDMA。話時話，邊一種正啲好難講，用開WCDMA嘅人，一定撐漫遊地區夠廣泛，幾乎全球通用；而支持CDMA2000嘅Fans，就期待緊好靚仔、功能又強嘅機種降臨。唔係想潑冷水，CDMA2000喺韓國真係勁，而且仲用佢嚟直播電視㖭，但講到底香港人鍾意四圍去、四圍玩，試諗吓如果走到歐洲、美國先發現收到唔「色怒」，你估會點？WCDMA冇訊號嗰陣，都仲有GSM頂上，最慘嘅係換上CDMA2000就真係窄好多。筆者唔係支持大家杯葛CDMA2000，而只當係一項Bonus去睇會比較適合，講到尾，WCDMA已經喺香港Run咗幾年，用戶多達一百幾十萬，CDMA2000想短時間跑贏人哋？睇嚟就冇咁快喇！
文：徐柱共