做鞋做到響晒朵嘅裕元工業，噚日將本年報擺上網，又趁舊年業績好，獎勵一吓班管理層，人人有人工加。好似主席蔡其能，佢06年度嘅董事酬金達1196.52萬元，較05年度加咗6.16%；董事總經理蔡乃峰，06年嘅董事酬金有1162.98萬元，都加咗成6.27%！
成個董事會計，整體酬金支付約6086.34萬元，比05年多4.11%，不過咁，05年董事人數15個，06年就多咗個，多個人多雙筷，冇法啦。睇番裕元舊年純利又真係升咗成19%喎，雖然撇除一次性收益增幅只有15%，加薪幅度都算克己。
今次裕元呢本年報，同前幾年啲就真係好唔同，我係話排版方面，可能換咗designer，入面靚咗唔使講，淨係個封面用藍天襯住成班小朋友，再加一嚿中國形狀嘅白雲，當堂成本嘢young晒。
[email protected]