所謂人怕出名豬怕肥，確係一啲都冇錯，但估唔到一向作風低調，屬於實幹型賓架嘅恒生銀行「二哥」（唔計非執行嘅董事長邵銘高）、常務董事兼副行政總裁潘仲賢（洋名Joseph）都會成為網上「跌錢黨」，冒名詐騙客仔嘅對象。
華華噚日就收到一名網友查詢，佢最近收到一封自稱係「肯記」（恒生）董事、名叫JosephPoon寄出嘅郵件，內容真係三歲細路都好難信，大意係有個中東客Muhannadal-Hakim，佢一家喺美伊戰爭中全家炸死，後繼無人，只有呢位偽冒嘅JosephPoon，知道佢喺恒生留低一筆近乎4500萬美金（3.5億港元）嘅巨款。
遺產冇人理 點會輪到你
根據特區法例，死者留低嘅銀行存款，過咗三年半冇人認領，就落入庫房個袋，咁故事發展落去，真係儍嘅都諗到，梗係叫個收件者，扮做中東佬嘅親人認領遺產，然後貢獻出寶貴嘅個人資料：大名、住址同埋密碼等等。
呢位網友都算醒㗎嘞，翻查「老肯」個官方網頁，又真係發現叫做JosephPoon嘅董事，所以一時間難辨真假。恒生公關大員當然即刻嚴正澄清，話從來冇任何高層發過咁嘅電郵，又將事件移交警方處理。
華華側聞，類似街邊跌錢黨呃阿婆「落叠」嘅網上版橋段，恒生早前發生過，不過主角換咗另一位高層，執行董事兼財務主管陳國威（洋名Patrick）。
至於恒生大班柯清輝，佢個大名就暫時冇俾騙徒利用，講落又係嘅，柯大俠個「朵」咁響，換轉係你收到封電郵，話佢係柯清輝，叫你一齊處理筆巨額遺產，講都唔信啦。
[email protected]